• ಸುಖವೆಂಬುದು  ವಸ್ತು ಸಂಗ್ರಹದಲ್ಲಿಲ್ಲ. ಸುಖವೆಂಬುದು ಆತ್ಮಾನುಗ್ರಹದಿಂದ ಆತ್ಮನಿಂದಲೇ ಆತ್ಮನಲ್ಲೇ ಸಿಗುವ ವಸ್ತುವು.

• ಹೊರಗೆ ಎಲ್ಲೂ ಸುಖವನ್ನು ಹುಡುಕಬೇಡ. ಸುಖವು ನಿನ್ನಲ್ಲಿಯೇ ಇದೆ.

• ಅಂದು (ಬಸವಣ್ಣನವರ ಕಾಲದಲ್ಲಿ) ದುಡಿಯುವುದು ಕಾಯಕವಾಗಿತ್ತು; ಇಂದು ಮಾತನಾಡುವುದೇ ಒಂದು ಕಾಯಕವಾಗಿದೆ. ದುಡಿಯದೆ ಅನಾಯಾಸವಾಗಿ ಸುಖಪಡಬೇಕೆಂಬ ಹಂಬಲವು ಇಡೀ ಜನಜೀವನವನ್ನೇ ಆವರಿಸಿದೆ. 

• ಮನುಷ್ಯನು ಮನಸ್ಸಿನಿಂದಲೇ ಹಾಳಾಗುವುದು. ಉದ್ಧಾರವಾಗುವುದೂ ಮನಸ್ಸಿನಿಂದಲೇ.

• ತನ್ನ ಮನಸ್ಸಿಗೆ ತಾನು ಅಂಜುವವನು ಶೀಘ್ರದಲ್ಲಿ ಉದ್ಧಾರವಾಗುತ್ತಾನೆ.  

• ನಿಂದಿಸುವವರು ನೀನಿರುವತನಕ ನಿಂದಿಸುತ್ತಾರೆ. ಕಡೆಗೆ ಸುಮ್ಮನಾಗುತ್ತಾರೆ. ನಾಯಿಗಳು ಹೆದರುವವನನ್ನು ಕಂಡರೆ ಬಹಳವಾಗಿ ಬೊಗಳುತ್ತವೆ. ಕೈಯಲ್ಲಿ ದೊಣ್ಣೆಯುಳ್ಳವನನ್ನು ಕಂಡರೆ ದಿಕ್ಕಾಪಾಲಾಗಿ ಓಡುತ್ತವೆ. 

• ಯಾವನು ತಾನು ಸತ್ಯವಂತನಾದರೂ ನಿಂದೆಗೆ ಪ್ರತಿನಿಂದೆಯನ್ನು ಮಾಡುತ್ತಾನೋ ಅವನು ತನ್ನ ವಾತಾವರಣವನ್ನು ಕೆಡಿಸಿಕೊಳ್ಳುತ್ತಾನೆ. 

• ಮಗುವಿಗೆ ಆಟದ ಸಾಮಾನುಗಳು ಸಿಕ್ಕರೆ ತಾಯಿಯನ್ನು ಮರೆಯುವುದು ಸ್ವಭಾವ. ಜೀವಾತ್ಮನಿಗೆ ವಿಷಯಗಳು ಸಿಕ್ಕರೆ ಪರಮಾತ್ಮನನ್ನು ಮರೆಯುವುದೂ ಸ್ವಭಾವ. 

• ಬ್ರಹ್ಮಚರ್ಯವಿಲ್ಲದವನು ಎಷ್ಟು ಗುಣಗಳನ್ನು ಸಂಪಾದಿಸಿದರೂ ಸ್ಥಿರವಾಗಿ ನಿಲ್ಲುವುದಿಲ್ಲ. ತೂತಿನ ಮಡಿಕೆಗೆ ನೀರು ಹಾಕಿದಂತಾಗುತ್ತದೆ. ಬ್ರಹ್ಮಚರ್ಯವಿಲ್ಲದವನು ಶಾಂತಿಯನ್ನು ಪಡೆಯಲಾರನು. 

• ಸತ್ಯ, ಬ್ರಹ್ಮಚರ್ಯ, ಪರೋಪಕಾರ ಈ ಮೂರು ಪರಮೇಶ್ವರನಲ್ಲಿಗೆ ಕರೆದುಕೊಂಡು ಹೋಗಲು ಸಾಧನಗಳು. ಸತ್ಯವೇ ರಥ. ಬ್ರಹ್ಮಚರ್ಯವೇ ಸಾರಥಿ. ಪರೋಪಕಾರವೇ ಅಶ್ವ. 

• ನುಡಿದಂತೆ ನಡೆಯುವುದನ್ನೂ ನಡೆದಂತೆ ನುಡಿಯುವುದನ್ನೂ ಕಲಿಯಬೇಕು. ನುಡಿ ಪುರಾತನರದಾಗಿ, ನಡೆ  ಕಿರಾತರದಾಗಬಾರದು. 

• ಕೇವಲ ಧರ್ಮ ಜ್ಞಾನದಿಂದ ನಾವು ಧರ್ಮಾನುಯಾಯಿಗಳಾಗಲಾರೆವು. ಜ್ಞಾನಕ್ಕೆ ತಕ್ಕಂತೆ ಆಚರಣೆ ಇರಬೇಕು. 

• ನೀತಿಯ ನೆಲೆಗಟ್ಟಿನ ಮೇಲೆ ನಿಂತ ಜೀವನವೇ ತುಂಬು ಜೀವನ.

• ಶಿಕ್ಷಣದಲ್ಲಿ ಪರಿವರ್ತನೆಯಾಗದೆ ಜಗತ್ತಿಗೆ ಸುಖವಿಲ್ಲ. ವಿದ್ಯಾರ್ಥಿಗಳಿಗೆ ಔದ್ಯೋಗಿಕ, ವ್ಯಾವಹಾರಿಕ, ಆಧ್ಯಾತ್ಮಿಕ ಮೂರು ಶಿಕ್ಷಣಗಳನ್ನು ಕೊಡಬೇಕು.

• ಸ್ತ್ರೀಯರಲ್ಲಿ ಸುಖವಿದ್ದರೆ ಪುರುಷರನ್ನು ಅವರು ಬಯಸುತ್ತಿರಲಿಲ್ಲ. ಪುರುಷರಲ್ಲಿ ಸುಖವಿದ್ದರೆ ಅವರು ಸ್ತ್ರೀಯರನ್ನು ಬಯಸುತ್ತಿರಲಿಲ್ಲ. ಇವರು ಅವರಲ್ಲಿ ಸುಖವಿದೆಯೆನ್ನುತ್ತಾರೆ. ಅವರು ಇವರಲ್ಲಿದೆಯೆನ್ನುತ್ತಾರೆ. ವಿಚಾರಶೀಲನಿಗೆ ಸುಖವು ಇಬ್ಬರಲ್ಲೂ ಇಲ್ಲ. ಆತ್ಮನಲ್ಲೇ ಸುಖವಿರುವುದು. ಆತ್ಮನೇ ಸುಖಕ್ಕಾಧಾರಭೂತನು.

-ಶ್ರೀ ತರಳಬಾಳು ಜಗದ್ಗುರು 
ಶ್ರೀ ಶಿವಕುಮಾರ ಶಿವಾಚಾರ್ಯ ಮಹಾಸ್ವಾಮಿಗಳವರು