ಅದೊಂದು ಸಂಪ್ರದಾಯಸ್ಥ ಕಡುಬಡತನದ ಕುಟುಂಬ. ಸಂಪ್ರದಾಯವೇ ದೇವರೆಂದು ನಂಬಿಕೊಂಡು ಬಂದ ಯಜಮಾನ, ಹಾಲನ್ನು ಕರೆದು ತನ್ನ ಕುಂಟು ಕುದುರೆಯು ಗಾಡಿ ಎಳೆಯದಿದ್ದಾಗ ತಾನೇ ಎಳೆದು ಕಷ್ಟಪಟ್ಟು ಮನೆ ಮನೆ ತಿರುಗಿ ಹಾಲು ಮಾರಿ ಸಂಸಾರದ ರಥವನ್ನು ಎಳೆಯಲು ಏಗುತ್ತಿದ್ದ ಮನುಷ್ಯ. ಅವನ ಹೆಸರು ತಿಮ್ಮರಾಯಪ್ಪ. ಬಡತನದ ಸಂಸಾರದ ನೊಗಕ್ಕೆ ಕೊರಳೊಡ್ಡಿದವಳು ಆತನ ಸಹಧರ್ಮಿಣಿ ಗುಂಡಮ್ಮ. ಅವರಿಗೆ ಸಾಲುಸಾಲಾಗಿ ಐದುಜನ ಹೆಣ್ಣುಮಕ್ಕಳು- ಶಕುಂತಲಾ, ಹರಿಣಿ, ಛಾಯಾ, ಶ್ರುತಿ, ಬೃಂದಾ, ಯುಗಾದಿ ಹಬ್ಬದ ದಿನದಂದು ಶಕುಂತಲಾಗೆ ಒಂದು ಸಂಬಂಧವನ್ನು ಮದುವೆ ದಲ್ಲಾಳಿ ಯಾಮಿನಿ ಹುಡುಕಿ ತರುತ್ತಾಳೆ. ಗಂಡು ಕುಬೇರಪ್ಪ, ಮಾಂಸದ ವ್ಯಾಪಾರಿ, ಆಗರ್ಭ ಶ್ರೀಮಂತ, ಆದರೆ ಅವನ ವಯಸ್ಸು ಮಾತ್ರ ತಿಮ್ಮರಾಯಪ್ಪನಿಗಿಂತ ತುಸು ಹೆಚ್ಚೇ! ಭೂತಗನ್ನಡಿ ಹಿಡಿದು ಹುಡುಕಿದರೂ ತಲೆಯಲ್ಲಿ ಒಂದು ಕೂದಲೂ ಇಲ್ಲದ ಬೋಳುದಲೆಯವನು! ಸಾಹುಕಾರನ ಸಂಬಂಧ ಗುಂಡಮ್ಮನಿಗೆ ಬಹಳ ಇಷ್ಟವಾಗುತ್ತದೆ. ಹಬ್ಬಕ್ಕೂ ಮುಂಚೆ ತಕ್ಷಣ ಹೋಗಿ ಆ ಕುಬೇರಪ್ಪನನ್ನು ಭೇಟಿ ಮಾಡಲು ಹೇಳುತ್ತಾಳೆ. ಏಕೆ ಎಂದು ಹೇಳುವುದಿಲ್ಲ. ತನ್ನ ಕರೆಯುವ ಹಸುವನ್ನು ಆ ಕಟುಕ ಕೊಂಡುಕೊಳ್ಳಲು ಹೇಳಿಕಳುಹಿಸಿರಬೇಕೆಂದು ತಿಮ್ಮರಾಯಪ್ಪ ಸಿಟ್ಟಿನಿಂದಲೇ ಹೋಗುತ್ತಾನೆ. ಆದರೆ ಕಟುಕ ಕುಬೇರಪ್ಪ ಬಯಸಿದ್ದು ಕರೆಯುವ ಹಸುವನ್ನಲ್ಲ, ಅವನ ಮುದ್ದಿನ ಮಗಳನ್ನು! ಹೆಂಡತಿ ಸತ್ತು ಒಂದು ವರ್ಷವಾಗಿತ್ತು. ಒಂಟಿತನ ಅವನನ್ನು ಕಾಡಿಸುತ್ತಿತ್ತು. ತನ್ನ ಅಂಗಡಿಗೆ ಆಗಾಗ್ಗೆ ಬರುತ್ತಿದ್ದ ಶಕುಂತಲೆಯ ಮೇಲೆ ಅವನ ಕಣ್ಣು ತನ್ನ ಮಗಳು ಹಾಲು ತುಪ್ಪದಲ್ಲಿ ಕೈತೊಳೆಯುತ್ತಾ ಸುಖವಾಗಿರಬಹುದು ಎಂದು ತಿಮ್ಮರಾಯಪ್ಪ ಮರು ಮಾತನಾಡದೆ ಒಪ್ಪಿಕೊಳುತ್ತಾನೆ. ಆದರೆ ಶಕುಂತಲಾ ಮಾತ್ರ ಆ ಸಂಬಂಧವನ್ನು ಸುತಾರಾಂ ಒಪ್ಪುವುದಿಲ್ಲ. ಹೆಚ್ಚಿನ ವರದಕ್ಷಿಣೆ ಕೊಡಲು ಸಾಧ್ಯವಾಗದ ಬಡತನದಲ್ಲಿ ಹುಟ್ಟಿದ ಹೆಣ್ಣುಮಕ್ಕಳು ಒಳ್ಳೆಯ ಗಂಡುಗಳಿಗೆ ಆಸೆಪಡಬಾರದು, ಪಾಲಿಗೆ ಬಂದದ್ದು ಪಂಚಾಮೃತ ಎಂದೇ ತಿಳಿದು ಸುಖವಾಗಿರುವುದನ್ನು ಕಲಿಯಬೇಕು ಎಂದು ತಾಯಿ ಹೇಳುತ್ತಾಳೆ. ಅವನದು ಬೋಳುದಲೆ ಎಂದದ್ದಕ್ಕೆ ಕೂದಲು ತಲೆಯವನೇ ಬೇಕೆಂದಿದ್ದರೆ ಮಂಗನಿಂದ ತಾಳಿ ಕಟ್ಟಿಸಿಕೋ! ಎಂದು ಮಗಳನ್ನು ಹಂಗಿಸುತ್ತಾಳೆ.

ವಾಸ್ತವವಾಗಿ ಶಕುಂತಲೆ ಮಾರುತಿ ಎಂಬ ಟೈಲರ್ ವೃತ್ತಿಯ ಯುವಕನನ್ನು ಪ್ರೀತಿಸುತ್ತಿರುತ್ತಾಳೆ. ಆದರೆ ಅವನು ಬಡವ. ಒಳ್ಳೆಯ ಟೈಲರಿಂಗ್ ಮಶೀನ್ ಸಹ ಅವನಲ್ಲಿರುವುದಿಲ್ಲ. ಇಬ್ಬರ ಪ್ರೀತಿಯ ವಿಷಯವನ್ನು ಹುಡುಗಿಯ ಅಪ್ಪನಿಗೆ ತಿಳಿಸಲು ಅವನಿಗೆ ಹಿಂಜರಿಕೆ, ಮೇಲಾಗಿ ಬಡತನ. ಚೆನ್ನಾಗಿ ದುಡಿದು ಸಂಪಾದಿಸಿ ಒಂದು ಸೆಕೆಂಡ್ ಹ್ಯಾಂಡ್ ಟೈಲರಿಂಗ್ ಮಶೀನ್ ಖರೀದಿಸಿ ಆರ್ಥಿಕವಾಗಿ ತನ್ನ ಸ್ಥಾನಮಾನವನ್ನು ಹೆಚ್ಚಿಸಿಕೊಂಡ ನಂತರವೇ ಮದುವೆಯಾಗುವುದಾಗಿ ಹುಡುಗಿಗೆ ಹೇಳುತ್ತಾನೆ. ಅಷ್ಟರೊಳಗೆ ತನ್ನನ್ನು ಮುದುಕನಾದ ಕುಬೇರಪ್ಪನಿಗೆ ಕೊಟ್ಟು ಮದುವೆ ಮಾಡಿಸಿಬಿಟ್ಟರೇನು ಗತಿ ಎಂದು ಶಕುಂತಲಾಳ ಚಿಂತೆ. ಆದ್ದರಿಂದ ಧೈರ್ಯಮಾಡಿ ಅವಳು ತಂದೆಯ ಬಳಿ ತನಗೀ ಮದುವೆ ಇಷ್ಟವಿಲ್ಲವೆಂತಲೂ ತಾನು ಮದುವೆಯಾಗುವುದಾದರೆ ಟೈಲರ್ ಮಾರುತಿಯನ್ನೇ ಎಂದು ಹಠಹಿಡಿಯುತ್ತಾಳೆ. ಬಡ ಟೈಲರನಿಗೆ ಮಗಳನ್ನು ಕೊಡಲು ತಂದೆ ಒಪ್ಪುವುದಿಲ್ಲ.

ಪ್ರೇಮಿಗಳಿಬ್ಬರೂ ಅಂಗಲಾಚಿ ತಿಮ್ಮರಾಯಪ್ಪನನ್ನು ಬೇಡಿಕೊಳುತ್ತಾರೆ. ಮಗಳ ಮೇಲಿನ ಪ್ರೀತಿಗೆ ಕರಗಿ ತಂದೆ ಒಪ್ಪಿಗೆ ಕೊಡುತ್ತಾನೆ. ಆದರೆ ಹೆಂಡತಿಯನ್ನು ಒಪ್ಪಿಸುವುದು ಹೇಗೆ? ಅದಕ್ಕೊಂದು ಉಪಾಯವನ್ನು ಅವನು ಮಾಡುತ್ತಾನೆ. ರಾತ್ರಿ ಮಲಗಿದ ಹೊತ್ತಿನಲ್ಲಿ ದಿಢೀರನೆ ಬೆಚ್ಚಿಬಿದ್ದವನಂತೆ ನಟಿಸುತ್ತಾ ಕಿಟಾರನೆ ಕಿರುಚಿ ಎದ್ದು ಕುಳಿತುಕೊಳ್ಳುತ್ತಾನೆ. ಏನಾಯಿತೆಂದು ಹೆಂಡತಿ ಕೇಳಿದಾಗ ತಾನೊಂದು ಭಯಾನಕ ದುಃಸ್ವಪ್ನವನ್ನು ಕಂಡಿದ್ದಾಗಿ ಹೇಳುತ್ತಾನೆ. ಅದೇನೆಂದರೆ ಕನಸಿನಲ್ಲಿ ತನ್ನ ತಾಯಿಯ ತಾಯಿ ಕಾಣಿಸಿಕೊಂಡಳು. ಅವಳಿಗೆ ತನ್ನ ಮರಿಮಗಳ ಮೇಲೆ ಅಪಾರ ಪ್ರೀತಿ! ಅವಳ ಹೆಸರನ್ನೇ ಮಗಳಿಗೆ ಇಡಲಾಗಿತ್ತಲ್ಲವೆ! ಮಗಳನ್ನು ಮಾಂಸದ ವ್ಯಾಪಾರಿಗೆ ಕೊಡಲು ತೀರ್ಮಾನಿಸಿದ್ದಕ್ಕೆ ಸಿಟ್ಟು ಮಾಡಿಕೊಂಡಳು. ಮೊಮ್ಮಗಳು ಪ್ರೀತಿಸುವ ಟೈಲರನಿಗೇ ಕೊಡಬೇಕು ಎಂದು ತಾಕೀತು ಮಾಡಿದಳು. ಅಷ್ಟೇ ಅಲ್ಲ, ಸ್ವಲ್ಪ ಸಮಯದ ನಂತರ ಮಾಂಸದ ವ್ಯಾಪಾರಿಯ ಮೃತಪಟ್ಟ ಮೊದಲ ಹೆಂಡತಿಯೂ ಕಾಣಿಸಿಕೊಂಡಳು. ಅವಳು ಕೆಂಡಾಮಂಡಲ ಸಿಟ್ಟಾಗಿದ್ದಳು. ತನ್ನ ಸ್ಥಾನವನ್ನು ತುಂಬಲು ಬೇರೊಂದು ಹೆಣ್ಣಿಗೆ ಎಂದಿಗೂ ಅವಕಾಶ ಮಾಡಿಕೊಡುವುದಿಲ್ಲ. ಒಂದು ವೇಳೆ ತನ್ನ ಎಚ್ಚರಿಕೆಯನ್ನೂ ಮೀರಿ ಮದುವೆ ಮಾಡಿದರೆ ಮೂರೇ ವಾರದಲ್ಲಿ ಎಲ್ಲರ ಗೋಣನ್ನು ಮುರಿಯುತ್ತೇನೆಂದು ಹೆದರಿಸಿದಳು. ನನಗೆ ವಿಪರೀತ ಭಯವಾಗಿದೆ ಏನೂ ತೋಚದೆ ದಿಙ್ಮೂಢನಾಗಿದ್ದೇನೆ ಎಂದು ತನ್ನ ಕನಸನ್ನು ವಿವರಿಸುತ್ತಾನೆ. ಕನಸಿನ ವಿವರವನ್ನು ಕೇಳಿದ ಗುಂಡಮ್ಮ ಗಾಬರಿಗೊಂಡು ಸತ್ತು ಸ್ವರ್ಗದಲ್ಲಿರುವ ಅಜ್ಜಿಯೇ ಬಂದು ಹೇಳಿರಬೇಕಾದರೆ ಹಾಗೆಯೇ ನಡೆಯುವುದು ಒಳ್ಳೆಯದು ಎನ್ನುತ್ತಾಳೆ. ಅಯ್ಯೋ ಕುಬೇರಪ್ಪನಿಗೆ ಮಾತು ಕೊಟ್ಟಾಗಿದೆಯಲ್ಲಾ ಎಂದು ತೊಳಲಾಡುವ ನಾಟಕ ಮಾಡುತ್ತಿದ್ದ ಗಂಡ ಒಳಗೊಳಗೆ ಮುಸಿ ಮುಸಿ ನಗುತ್ತಾನೆ! ಇಬ್ಬರ ಮದುವೆ ಆ ಸಂದರ್ಭದ ಜನಾಂಗೀಯ ಹಿಂಸಾಚಾರದ ಮಧ್ಯೆಯೂ ನಡೆದೇ ಹೋಗುತ್ತದೆ.

ತಾನಾಯಿತು ತನ್ನ ಓದಾಯಿತು ಎಂದು ಇದ್ದವಳು ಎರಡನೆಯ ಮಗಳು ಹರಿಣಿ. ಅವಳು ರಸ್ತೆಯಲ್ಲಿ ನಡೆದು ಹೋಗುತ್ತಿರುವಾಗ ಕೆಲವು ಪೋಲಿ ಯುವಕರು ಹಿಂದೆ ಬಿದ್ದು ಚುಡಾಯಿಸುತ್ತಾರೆ. ಅವರಿಂದ ಅವಳನ್ನು ರಕ್ಷಿಸಿದವನು ಕ್ರಾಂತಿಕಾರಿ ಯುವಕ, ಪುರುಷೋತ್ತಮ. ಅವರಿಬ್ಬರ ಮಧ್ಯೆ ಪುಸ್ತಕ ವಿನಿಮಯದಿಂದ ಆರಂಭವಾದ ಪರಿಚಯ ಪ್ರೇಮದಲ್ಲಿ ಕೊನೆಗೊಳ್ಳುತ್ತದೆ. ಇವರಿಬ್ಬರೂ ಮದುವೆಗೆ ಆಶೀರ್ವಾದ ಬೇಡುತ್ತಾರೆ. ಯಾರನ್ನು ಕೇಳಿ ನೀನು ಪ್ರೀತಿಸಿದೆ, ಇದಕ್ಕೆ ನನ್ನ ಒಪ್ಪಿಗೆ ಸಾಧ್ಯವೇ ಇಲ್ಲ ಎನ್ನುತ್ತಾನೆ. ಅಪ್ಪಾ ನಾವು ನಿನ್ನ ಒಪ್ಪಿಗೆ ಕೇಳುತ್ತಿಲ್ಲ, ಮದುವೆಗೆ ಆಶೀರ್ವಾದ ಬೇಡುತ್ತೇವೆ ಎಂದ ಮಗಳ ಮಾತಿಗೆ ಕೆರಳಿ ಕೆಂಡವಾಗುತ್ತಾನೆ. ಆದರೂ ಮಗಳ ಮೇಲಿನ ಕಕ್ಕುಲಾತಿ ಅವನನ್ನು ಕರಗಿಸುತ್ತದೆ. ಮದುವೆಗೆ ಅಸ್ತು ಎನ್ನುತ್ತಾನೆ.

ಮೂರನೆಯ ಮಗಳು ಛಾಯಾಳದ್ದೂ ಹಿರಿಯಕ್ಕಗಳ ಚಾಳಿಯೇ. ಅವಳು ಪ್ರೀತಿಸಿದ ಯುವಕ ಥಾಮಸ್‌ ನೊಂದಿಗೆ ಓಡಿಹೋಗುತ್ತಾಳೆ. ಚರ್ಚಿನಲ್ಲಿ ಮದುವೆಯಾಗಿ ನಂತರ ತಂದೆಯ ಆಶೀರ್ವಾದ ಪಡೆಯಲು ಬರುತ್ತಾಳೆ. ನೀನು ನನ್ನ ಮಗಳೇ ಅಲ್ಲ, ನನ್ನ ಪಾಲಿಗೆ ನೀನು ಸತ್ತಂತೆಯೇ, ತೊಲಗಾಚೆ, ನನ್ನ ಕಣ್ಣಮುಂದಿರಬೇಡ ಎಂದು ತಿರಸ್ಕರಿಸುತ್ತಾನೆ. ಮೊದಲ ಇಬ್ಬರು ಹೆಣ್ಣುಮಕ್ಕಳ ಪ್ರೇಮವಿವಾಹಕ್ಕೆ ಮನಸ್ಸಿಲ್ಲದಿದ್ದರೂ ಒಪ್ಪಿಗೆ ಕೊಟ್ಟ ತಂದೆ ಮೂರನೆಯ ಮಗಳ ಪ್ರೀತಿಯನ್ನು ಪುರಸ್ಕರಿಸುವುದಿಲ್ಲ. ಅದಕ್ಕೆ ಕಾರಣ ಮೊದಲಿಬ್ಬರು ಮಕ್ಕಳು ಪ್ರೀತಿಸಿದ ಹುಡುಗರು ಬಡವರಾದರೂ ಸಧರ್ಮದವರು. ಮೂರನೆಯವಳು ಪ್ರೀತಿಸಿದ ಹುಡುಗ ಬೇರೆ ಧರ್ಮದವನು.

ಅಷ್ಟರಲ್ಲಿ ದೇಶದಲ್ಲಿ ನಡೆದ ಜನಾಂಗೀಯ ಘರ್ಷಣೆ ತಾರಕಕ್ಕೇರುತ್ತದೆ. ಹಳ್ಳಿಯ ಜನರೆಲ್ಲರೂ ಮನೆ ಮಠ ಬಿಟ್ಟು ದೇಶಾಂತರ ಹೋಗಬೇಕಾಗುತ್ತದೆ. ತನ್ನ ಹಸುಗಳು, ಕುಂಟು ಕುದುರೆ ಸಾಮಾನು ಸರಂಜಾಮುಗಳನ್ನು ಬಿಟ್ಟು ಕಣ್ಣೀರಲ್ಲಿ ಕೈತೊಳೆಯುತ್ತಾ ಅವನು ಊರು ಬಿಟ್ಟು ಅಮೆರಿಕದ ಕಡೆಗೆ ನಿರಾಶ್ರಿತನಾಗಿ ಹೋಗುತ್ತಾನೆ. ಬದುಕಿನ ಬಂಡಿ ಎಳೆಯಲು ಎರಡನೆಯ ಇನ್ನಿಂಗ್ಸ್ ಆರಂಭಿಸಲು ಕೃತಸಂಕಲ್ಪನಾಗುತ್ತಾನೆ.

ಇದು ವಾಸ್ತವಾಗಿ ರಷ್ಯನ್ ಕಥೆ. ತ್ಸಾರ್ ಚಕ್ರವರ್ತಿಗಳ ಕಾಲದ ಯಹೂದಿ ಕುಟುಂಬವೊಂದರ ಸುತ್ತ ಹೆಣೆದ ಕಥೆಯಿದು. ಇಲ್ಲಿ ಹೆಸರುಗಳನ್ನು ಮಾತ್ರ ಬದಲಾಯಿಸಲಾಗಿದೆ. ಹಿಂದಿನ ಬಾರಿಯ ಅಂಕಣದ ಆರಂಭದಲ್ಲಿ A Fiddler on the Roof” ಗೀತನಾಟಕದ ಆರಂಭದ ಸಾಲುಗಳ ನಮ್ಮ ಭಾವಾನುವಾದವನ್ನು ಓದಿರುತ್ತೀರಿ. ಅದರ ಮುಂದಿನ ಕಥಾನಿರೂಪಣೆ ಇದು. ಸಂಪ್ರದಾಯವನ್ನು ಮುರಿಯಲಾಗದ, ಮಕ್ಕಳ ಮನಸ್ಸನ್ನು ಘಾಸಿಗೊಳಿಸಲಾಗದ ತಂದೆಯ ತೊಳಲಾಟ ಇಲ್ಲಿದೆ. ಮೂಲಕಥೆಯಲ್ಲಿ ಬರುವ ತಂದೆಯ ಹೆಸರು    Tevye. ತಾಯಿಯ ಹೆಸರು Golde.ಮೊದಲ ಮಗಳು Tzeitel, ಅವಳು ಪ್ರೀತಿಸಿದ ಟೈಲರ್ ಯುವಕ Motel Kamzoiಎರಡನೆಯ ಮಗಳು Hodel. ಅವಳು ಪ್ರೀತಿಸಿದ ಕ್ರಾಂತಿಕಾರಿ ಯುವಕ Perchik. ಮೂರನೆಯ ಮಗಳು Chava. ಅವಳು ಪ್ರೀತಿಸಿದ ಕ್ರಿಶ್ಚಿಯನ್ ಯುವಕ Fyedka. ಉಳಿದಿಬ್ಬರು ಚಿಕ್ಕ ಹೆಣ್ಣು ಮಕ್ಕಳು Shprintze ಮತ್ತು Bielke. ಮದುವೆ ದಲ್ಲಾಳಿಯ ಹೆಸರು  Yente. ಶ್ರೀಮಂತ ಮಾಂಸದ ವ್ಯಾಪರಿ Lazar Wolf.

ಮೇಲಿನ ಕಥೆ ಓದುವಾಗ ಇದು ಥೇಟ್ ಇಂದಿನ ನಮ್ಮ ದೇಶದ ಕಥೆಯೇ ಇರಬೇಕೆಂದು ನಿಮಗೆ ಅನ್ನಿಸಿರಬೇಕಲ್ಲವೇ? ಕಥೆ ಕಾಲಾತೀತ,ಕಥಾವಸ್ತು ದೇಶಾತೀತ!

-ಶ್ರೀ ತರಳಬಾಳು ಜಗದ್ಗುರು
ಡಾ|| ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು
ಸಿರಿಗೆರೆ.

ವಿಜಯ ಕರ್ನಾಟಕ 
ಬಿಸಿಲು ಬೆಳದಿಂಗಳು ದಿ: 22.8.2013