ಮೊನ್ನೆ ಮಂಗಳವಾರ ಬೆಳಗಿನ ವಾಯುವಿಹಾರ ಮುಗಿಸಿಕೊಂಡು ವಾಪಾಸು ಬರುತ್ತಿದ್ದಂತೆಯೇ ರಾಜ್ಯಸರಕಾರದ ಕಂದಾಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಶ್ರೀ ಗಂಗಾರಾಂ ಬಡೇರಿಯಾ ಅವರಿಂದ ದೂರವಾಣಿ ಕರೆ. ಅವರ ದನಿಯಲ್ಲಿ ಕೃತಕೃತ್ಯತೆಯ ಭಾವ ಘನೀಭವಿಸಿತ್ತು. ವಿಪತ್ತು ನಿರ್ವಹಣೆಯ ಹೊಣೆಗಾರಿಕೆ ಹೊತ್ತಿರುವ ಅವರು "ಭೂಮಿ ಆನ್ ಲೈನ್ ಪರಿಹಾರ" ತಂತ್ರಾಂಶದಲ್ಲಿ (software) ಗ್ರಾಮಲೆಕ್ಕಿಗರು ಮಾಡಬೇಕಾದ ದತ್ತಾಂಶ ಸಂಕಲನ (data entry) ಬಹುಮಟ್ಟಿಗೆ ಪೂರ್ಣಗೊಂಡಿದ್ದು ಆ ದಿನ ಸಂಜೆ 4.30 ಗಂಟೆಗೆ ಬೆಳೆನಷ್ಟ ಪರಿಹಾರದ ಮೊದಲ ಕಂತು 671 ಕೋಟಿ ರೂ. ಗಳನ್ನು ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ರೈತರ ಬ್ಯಾಂಕ್ ಖಾತೆಗೆ ನೇರವಾಗಿ ಜಮಾ ಮಾಡಲಿದ್ದಾರೆಂಬ ಸಂತಸದ ಸಂಗತಿಯನ್ನು ನಮ್ಮೊಂದಿಗೆ ಹಂಚಿಕೊಂಡರು. ಅವರೊಂದಿಗೆ ಸಂಭಾಷಣೆ ಮುಗಿದು ಫೋನ್ ಕೆಳಗಿಡುತ್ತಿದ್ದಂತೆಯೇ ಹೆಚ್ಚುವರಿ ಮುಖ್ಯಕಾರ್ಯದರ್ಶಿಗಳಾದ "ಭೂಮಿ" ತಂತ್ರಾಂಶದ ರೂವಾರಿಗಳೂ ಆದ ಶ್ರೀ ರಾಜೀವ್ ಚಾವಲಾ ಅವರಿಂದಲೂ ಇದೇ ವಿಚಾರವಾಗಿ ಫೋನ್ ಕರೆ.

ಈ ಈರ್ವರೂ ಉನ್ನತ ಅಧಿಕಾರಿಗಳು ನಮ್ಮ ಸಂಪರ್ಕಕ್ಕೆ ಬಂದದ್ದು ಆರು ತಿಂಗಳ ಹಿಂದೆ. ಕಳೆದ ಸೆಪ್ಟೆಂಬರ್ ತಿಂಗಳು ನಮ್ಮ ಲಿಂಗೈಕ್ಯ ಗುರುವರ್ಯರ ಶ್ರದ್ಧಾಂಜಲಿ ಸಮಾರಂಭದ ಸಂದರ್ಭದಲ್ಲಿ ಮಾಜಿ ಮುಖ್ಯಮಂತ್ರಿಗಳಾದ ಎಡೆಯೂರಪ್ಪನವರ ಅಧ್ಯಕ್ಷತೆಯಲ್ಲಿ ಏರ್ಪಡಿಸಿದ್ದ "ಬೆಳೆ ವಿಮೆ ಸಂವಾದ" ಕಾರ್ಯಕ್ರಮದಲ್ಲಿ. ಬೆಳೆ ವಿಮೆಯಿಂದ ರೈತರಿಗೆ ಹೇಗೆ ಮೂರು ಕಾಸಿನ ಪ್ರಯೋಜನವಿಲ್ಲ; ಅದೇನಿದ್ದರೂ ವಿಮಾ ಕಂಪನಿಗಳಿಗೇ ಲಾಭ ಎಂಬ ಕಟುಸತ್ಯವನ್ನು ಪ್ರತಿಪಾದಿಸಿ "ಪ್ರಧಾನಮಂತ್ರಿ ಫಸಲ್ ಬಿಮಾ ಯೋಜನೆ"ಯ ನಿಯಮಗಳು ಹೇಗೆ ದೋಷಪೂರ್ಣವಾಗಿವೆ ಎಂಬುದನ್ನು ಎಳೆ ಎಳೆಯಾಗಿ ಬಿಡಿಸಿ ತೋರಿಸಿದ್ದನ್ನು ಬಹಿರಂಗ ವೇದಿಕೆಯಲ್ಲಿ ಒಪ್ಪಿಕೊಂಡ ಶ್ರೀ ಚಾವಲಾ ಅವರು ಅಂದಿನಿಂದ ನಮಗೆ ಹತ್ತಿರವಾಗತೊಡಗಿದರು. ಸಂವಾದವು ಕಾರ್ಯಕ್ರಮದೊಂದಿಗೆ ಮುಕ್ತಾಯಗೊಳ್ಳದೆ ನಂತರವೂ ನಮ್ಮೀರ್ವರ ಮಧ್ಯೆ ಅನೇಕ ಮೀಟಿಂಗ್ಗಳು ನಡೆದು ಈ ವಿಷಯವಾಗಿ ಚರ್ಚೆ ಮುಂದುವರಿಯಿತು. ಉನ್ನತ IAS ಅಧಿಕಾರಿಗಳಾದ ಇವರು ಬೆಂಗಳೂರಿನಿಂದ ಸಿರಿಗೆರೆಗೆ ಬಂದು ರೈತಮುಖಂಡರೂ ಮತ್ತು ಕೃಷಿ ಅಧಿಕಾರಿಗಳೊಂದಿಗೆ ಏರ್ಪಡಿಸಿದ ಎಲ್ಲ ಪ್ರಮುಖ ಖಾಸಗಿ ಮೀಟಿಂಗ್ಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಂಡಿದ್ದು ನಮಗೆ ಅಚ್ಚರಿಯನ್ನುಂಟುಮಾಡಿತು. ಕಳೆದ ನವಂಬರ್ ತಿಂಗಳ ಒಂದು ಸಭೆಯಲ್ಲಿ ಬೆಳೆನಷ್ಟ ಪರಿಹಾರಕ್ಕೆ ಸಂಬಂಧಿಸಿದಂತೆ ಹಳೆಯ ಶಾನುಭೋಗರ ಕಾಲದ ಪದ್ಧತಿಯನ್ನು ಕೈಬಿಟ್ಟು ಆಧುನಿಕ ತಂತ್ರಜ್ಞಾನವನ್ನು ಬಳಸಿಕೊಂಡು ಒಂದು ತಂತ್ರಾಂಶವನ್ನು ರೂಪಿಸಬಾರದೇಕೆ ಎಂಬ ನಮ್ಮ ಸಲಹೆಯನ್ನು ಅವರು ಮನಸಾರೆ ಒಪ್ಪಿಕೊಂಡದ್ದು ನಮಗೆ ಇನ್ನೂ ಅಚ್ಚರಿ ಮೂಡಿಸಿತು. ಅವರು ಬೆಂಗಳೂರಿಗೆ ಹಿಂದಿರುಗಿದ ಮೇಲೆ ಅವರಿಂದ ವಿಷಯ ತಿಳಿದ ಪ್ರಧಾನ ಕಾರ್ಯದರ್ಶಿ ಶ್ರೀ ಗಂಗಾರಾಂ ಬಡೇರಿಯಾರವರು ನಮಗೆ ಅಪರಿಚಿತರಾದರೂ ಸ್ವತಃ ಫೋನ್ ಮಾಡಿ ಪರಿಚಯ ಮಾಡಿಕೊಂಡು ಆ ತಂತ್ರಾಂಶ ರೂಪಿಸುವ ವಿಚಾರದಲ್ಲಿ “ತಮ್ಮೊಂದಿಗೆ ಸಮಾಲೋಚನೆ ನಡೆಸಲು ಸಾಫ್ಟ್ ವೇರ್ ಟೀಮಿನ ಮುಖ್ಯಸ್ಥರಾದ ಶ್ರೀ ಸುರೇಶ್ ನಾಯರ್ ಅವರನ್ನು ತಮ್ಮಲ್ಲಿಗೆ ಕಳುಹಿಸಿಕೊಡುತ್ತೇನೆ" ಎಂದು ಹೇಳಿ ಮಾರನೆಯ ದಿನವೇ ಕಳುಹಿಸಿಕೊಟ್ಟದ್ದು ಅಧಿಕಾರಶಾಹಿಯ (bureaucracy) ಬಗ್ಗೆ ನಮಗಿದ್ದ ಪೂರ್ವಾಗ್ರಹ ಭಾವನೆಯನ್ನು (prejudice) ದೂರಮಾಡಿತು. ಬರಗಾಲದ ಬವಣೆಯಿಂದ ತತ್ತರಿಸಿದ "ರೈತರ ಬಾಳಿಗೆ ನಿರಾಧಾರವಾದ ಆಧಾರ್" ಎಂಬ ವಿಷಯ ಕುರಿತು ಇದೇ ಅಂಕಣದಲ್ಲಿ ಹಿಂದೆ ಬರೆದ ನಮ್ಮ ಲೇಖನವನ್ನು ಓದಿದ ಶ್ರೀ ಚಾವಲಾರವರಿಂದ ಬಂದ ಪ್ರತಿಕ್ರಿಯೆ "I read your article. Each word is hard truth. We bureaucrats need to perform which I feel we are not doing." ಇಂತಹ ಮುಕ್ತ ಮನಸ್ಸಿನ ಈ ಅಧಿಕಾರಿಗಳೊಂದಿಗೆ ಕಳೆದ ನಾಲ್ಕು ತಿಂಗಳಲ್ಲಿ ನಡೆದ ನಮ್ಮ ಸುದೀರ್ಘ ದೂರವಾಣಿ ಸಂಭಾಷಣೆ, 300 ಕ್ಕೂ ಹೆಚ್ಚು SMS ಗಳು ಮತ್ತು ಮಿಂಚೋಲೆಗಳ ಹಿನ್ನೆಲೆಯಲ್ಲಿ ರೂಪಿತಗೊಂಡ ತಂತ್ರಾಂಶವೇ "ಭೂಮಿ ಆನ್ ಲೈನ್ ಪರಿಹಾರ".

ಎಲ್ಲರ ಸಲಹೆ ಪಡೆದು ಕೇವಲ ಮೂರೇ ತಿಂಗಳಲ್ಲಿ ಯುವ ಉತ್ಸಾಹೀ ಇಂಜಿನಿಯರುಗಳು ರೂಪಿಸಿದ ಈ ತಂತ್ರಾಂಶದ ಕಾರ್ಯನಿರ್ವಹಣೆಯನ್ನು ಪರಿಚಯಿಸಲು ಸಚಿವರಾದ ಶ್ರೀ ಕಾಗೋಡು ತಿಮ್ಮಪ್ಪನವರು, ಶ್ರೀ ಕೃಷ್ಣ ಬೈರೇಗೌಡರು, ಶ್ರೀ ಎಸ್.ಎಸ್. ಮಲ್ಲಿಕಾರ್ಜುನರವರು, ಶ್ರೀ ಆಂಜನೇಯರವರು ಮತ್ತು ಉನ್ನತ ಅಧಿಕಾರಿಗಳ ಸಭೆಯನ್ನು ಬೆಂಗಳೂರಿನ ನಮ್ಮ ತರಳಬಾಳು ಕೇಂದ್ರದಲ್ಲಿ ಕಳೆದ ಜನವರಿ ತಿಂಗಳು 18ರಂದು ಕರೆಯಲಾಯಿತು. ಹಿರಿಯ ತಲೆಮಾರಿನ ಸಚಿವರಾದ ಕಾಗೋಡು ತಿಮ್ಮಪ್ಪನವರಿಗೆ ಕೃಷ್ಣ ಬೈರೇಗೌಡರಂತೆ ಆಧುನಿಕ ತಂತ್ರಜ್ಞಾನದ ಪರಿಚಯವಿಲ್ಲ. ತಂತ್ರಾಂಶವನ್ನು ವೀಕ್ಷಣೆ ಮಾಡಿದ ಅವರು ನಮ್ಮ ಮೇಲೆ ಅಪಾರ ಗೌರವವಿದ್ದರೂ ತಕ್ಷಣವೇ ಒಪ್ಪಲಿಲ್ಲ. ಜನಸಾಮಾನ್ಯರ ಬಗ್ಗೆ ಕಾಳಜಿಯುಳ್ಳ ಅವರು ಪರದೆಯ ಮೇಲೆ ಕಾಣಿಸಿದ ದತ್ತಾಂಶದ ಪುಟವನ್ನು ನೋಡಿ "ಇದರ ಫಾರಂ ನಂಬರ್ ಏನು?” ಎಂದು ಕೇಳಿದ ಪ್ರಶ್ನೆಯನ್ನು ಬೇರೆ ಯಾರಾದರೂ ಕೇಳಿದ್ದರೆ ಸಾಫ್ಟ್ವೇರ್ ಇಂಜಿನಿಯರುಗಳು ನಕ್ಕುಬಿಡುತ್ತಿದ್ದರು. ನಾವು ಮಧ್ಯೆ ಪ್ರವೇಶಿಸಿ ನೀವು ನೋಡುತ್ತಿರುವ ಈ ಪುಟವನ್ನು ರಾಜ್ಯದ ಎಲ್ಲ ಗ್ರಾಮಲೆಕ್ಕಿಗರೂ ನೋಡಬಹುದು ಎಂದು ಹೇಳಿ ರಾಜ್ಯಾದ್ಯಂತ ಇರುವ ಲಕ್ಷಾಂತರ ರೈತರ ಆಧಾರ್ ಕಾರ್ಡ್ ನಂಬರ್, ಅಕೌಂಟ್ ನಂಬರ್, ಮೊಬೈಲ್ ನಂಬರ್ ಮತ್ತು ಬೆಳೆಯ ಮಾಹಿತಿಯನ್ನು ಅಂತರಜಾಲದಲ್ಲಿ ಹೇಗೆ ಸುಲಭವಾಗಿ ಕ್ರೋಢೀಕರಿಸಲಾಗುತ್ತದೆ, ಇದರಿಂದ ಬಡ ರೈತರನ್ನು ಆಫೀಸುಗಳಿಗೆ ಓಡಾಡಿಸದೆ, ಮಧ್ಯವರ್ತಿಗಳ ಹಾವಳಿಯಿಲ್ಲದೆ ಹೇಗೆ ರೈತರ ಅಕೌಂಟಿಗೆ ಪರಿಹಾರದ ಹಣವನ್ನು ನೇರವಾಗಿ ಜಮಾ ಆಗುವಂತೆ ಮಾಡಬಹುದು ಎಂಬುದನ್ನು ವಿವರಿಸಿದಾಗ ದೂರದ ಗ್ರಾಮಲೆಕ್ಕಿಗರಿಗೆ ಫೋನ್ ಮಾಡಿಸಿ ಸ್ವತಃ ಅವರೊಂದಿಗೆ ಮಾತನಾಡಿ ಖಚಿತಪಡಿಸಿಕೊಂಡ ಮೇಲೆಯೇ ಕಾಗೋಡು ತಿಮ್ಮಪ್ಪನವರು ತಮ್ಮ ಬಿಗಿಪಟ್ಟನ್ನು ಸಡಿಲಿಸಿ ಈ ತಂತ್ರಾಂಶದ ಬಳಕೆಗೆ ತಮ್ಮ ಒಪ್ಪಿಗೆಯನ್ನು ನೀಡಿದರು. ನಮಗೆ ಆಗ ನೆನಪಾಗಿದ್ದು ಮೈಸೂರು ಸಂಸ್ಥಾನವನ್ನು ಆಳಿದ ಹೈದರಾಲಿ ಅನಕ್ಷರಸ್ಥನಾಗಿದ್ದರೂ ಹೇಗೆ ದಕ್ಷತೆಯಿಂದ ರಾಜ್ಯಭಾರ ಮಾಡುತ್ತಿದ್ದ ಎಂಬುದಕ್ಕೆ ಎಲ್ಲಿಯೋ ಓದಿದ ಒಂದು ಘಟನೆ. ಹೈದರಾಲಿ ತನ್ನ ಕರಣಿಕರಿಗೆ ಹೇಳಿ ಬರೆಸುತ್ತಿದ್ದ ಪತ್ರಕ್ಕೆ ಸಹಿ ಹಾಕುವ ಮೊದಲು ಬೇರೆಯವರಿಂದ ಓದಿಸಿ ಕೇಳುತ್ತಿದ್ದನಂತೆ. ತಾನು ಹೇಳಿದಂತೆ ಬರೆದಿದ್ದರೆ ಸರಿ, ಇಲ್ಲದಿದ್ದರೆ ತಪ್ಪಾಗಿ ಬರೆದು ಮೋಸ ಮಾಡಲು ಯತ್ನಿಸಿದ ಕರಣಿಕನ ತಲೆಯನ್ನು ಕತ್ತರಿಸಿ ಹಾಕುತ್ತಿದ್ದನಂತೆ!

ಈ ವಿನೂತನ "ಭೂಮಿ ಆನ್ ಲೈನ್ ಪರಿಹಾರ" ತಂತ್ರಾಂಶವನ್ನು ಸಾಫ್ಟ್ವೇರ್ ಇಂಜಿನಿಯರುಗಳು ಭೂಮಿ ತಂತ್ರಾಂಶಕ್ಕೆ ಜೋಡಣೆ ಮಾಡಿರುತ್ತಾರೆ. ರಾಜ್ಯದ ಪ್ರತಿಯೊಬ್ಬ ಗ್ರಾಮಲೆಕ್ಕಿಗನೂ ಅವನ ವ್ಯಾಪ್ತಿಗೆ ಬರುವ ಹಳ್ಳಿಗಳ ರೈತರ ಮಾಹಿತಿಯನ್ನು ನೀಡುವ ಹೊಣೆಗಾರಿಕೆಯುಳ್ಳವನಾಗಿದ್ದಾನೆ. ಅವನೇನಾದರೂ ತಪ್ಪು ಮಾಹಿತಿ ನೀಡಿದ್ದರೆ ಅದನ್ನು ಪತ್ತೆ ಹಚ್ಚುವ ಕ್ಷಮತೆ ಈ ತಂತ್ರಾಂಶಕ್ಕಿದೆ. ಆಧಾರ್ ಕಾರ್ಡ್ನಲ್ಲಿರುವ ಹೆಸರು ಪಹಣಿಯಲ್ಲಿರುವ ಹೆಸರಿಗೆ ತಾಳೆಯಾಗದಿದ್ದರೆ ಈ ತಂತ್ರಾಂಶ ತಿರಸ್ಕರಿಸುತ್ತದೆ. ಇದುವರೆಗೆ 42.5 ಲಕ್ಷ ಸರ್ವೇ ನಂಬರ್ಗಳು ದಾಖಲಾಗಿವೆ. ಇವುಗಳಲ್ಲಿ 30 ಲಕ್ಷ ಸರ್ವೇ ನಂಬರ್ ಸರಿ ಇದೆಯೆಂದು ಪರಿಗಣಿಸಿದೆ. 12.5 ಲಕ್ಷ ಮಾಹಿತಿ ಸರಿ ಇಲ್ಲವೆಂದು ತಿರಸ್ಕರಿಸಿ ತಪ್ಪುಗಳನ್ನು ತಿದ್ದಿ ಮರುಸಲ್ಲಿಕೆ ಮಾಡಲು ಗ್ರಾಮಲೆಕ್ಕಿಗರಿಗೆ ತಂತ್ರಾಂಶ ನಿರ್ದೇಶಿಸಿದೆ. ಕೇಂದ್ರ ಸರಕಾರದಿಂದ ಮುಂಜೂರಾಗಿರುವ ಬೆಳೆನಷ್ಟ ಪರಿಹಾರದ ಮೊತ್ತ 1,782 ಕೋಟಿ ರೂ.ಗಳು. ಇದರಲ್ಲಿ 450 ಕೋಟಿ ರೂ. ಮಾತ್ರ ಬಿಡುಗಡೆಯಾಗಿದೆ. ಇದುವರೆಗೆ ಸಮರ್ಪಕವಾಗಿ ಮಾಹಿತಿ ನೀಡಿರುವ ಎಲ್ಲ ರೈತರಿಗೆ ಪಾವತಿಸಲು ಇಷ್ಟೊಂದು ಹಣ ಸಾಕಾಗುವುದಿಲ್ಲ. ಈ ಹಣವನ್ನು ರೈತರಿಗೆ ವಿತರಣೆ ಮಾಡದ ಹೊರತು ಬಾಕಿ ಹಣ ಕೇಂದ್ರಸರಕಾರದಿಂದ ಬಿಡುಗಡೆಯಾಗುವುದಿಲ್ಲ. ಇದು ಒಂದು ರೀತಿಯಲ್ಲಿ "ಹುಚ್ಚು ಬಿಡದ ಹೊರತು ಮದುವೆಯಾಗುವುದಿಲ್ಲ; ಮದುವೆಯಾಗದ ಹೊರತು ಹುಚ್ಚು ಬಿಡುವುದಿಲ್ಲ" ಎಂಬ ಗಾದೆ ಮಾತಿನಂತಹ ಪರಿಸ್ಥಿತಿ ರಾಜ್ಯ ಸರಕಾರ ಮತ್ತು ಕೇಂದ್ರ ಸರಕಾರದ ಮಧ್ಯೆ ಉಂಟಾಗಿದೆ. ಇಂತಹ ವಿಷಮ ಪರಿಸ್ಥಿತಿಯನ್ನು ಯಾವ ರಾಜಕೀಯ ಪಕ್ಷದವರೂ ಅಧಿವೇಶನ ನಡೆಯುತ್ತಿರುವ ಈ ಸಂದರ್ಭದಲ್ಲಿ ದುರ್ಬಳಕೆ ಮಾಡಿಕೊಂಡು ಪರಸ್ಪರ ದ್ವೇಷಾರೋಪಣೆ ಮಾಡುವ ಕೀಳು ರಾಜಕೀಯ ಮಾಡಬಾರದು. 29ಪರಿಸ್ಥಿತಿಯ ಗಂಭೀರತೆಯನ್ನು ಗಮನಿಸಿ ರಾಜ್ಯ ಸರಕಾರ ಮುಂಗಡವಾಗಿ 221 ಕೋಟಿ ರೂ.ಗಳನ್ನು ಸೇರಿಸಿ ಒಟ್ಟು 671 ಕೋಟಿ ರೂ.ಗಳನ್ನು ನಿನ್ನೆ ಸುಮಾರು 10 ಲಕ್ಷ ರೈತರ ಖಾತೆಗೆ ನೇರವಾಗಿ ಜಮಾ ಮಾಡುವ ಸಮಯೋಚಿತ ನಿರ್ಧಾರ ಕೈಗೊಂಡಿದೆ. ಈಗ ರಾಜ್ಯಸರಕಾರ ಮಾಡಬೇಕಾದ ಮತ್ತೊಂದು ಮುಖ್ಯವಾದ ಕಾರ್ಯವೆಂದರೆ ಈ ಪರಿಹಾರದ ಹಣವನ್ನು ಯಾವ ಕಾರಣಕ್ಕೂ ರೈತರ ಸಾಲಕ್ಕೆ ಮುರಿದುಕೊಳ್ಳದಂತೆ ಬ್ಯಾಂಕುಗಳನ್ನು ನಿರ್ಬಂಧಿಸುವುದು. ಇಲ್ಲದಿದ್ದರೆ "ಹಾವು ಹೊಡೆದು ಹದ್ದಿಗೆ ಹಾಕಿದರು" ಎಂಬ ಗಾದೆ ಮಾತಿನಂತಾಗುತ್ತದೆ. "ನೇಗಿಲ ಹಿಡಿದು ಹೊಲದಲಿ ಹಾಡುತ ಉಳುವ ಯೋಗಿಯ ನೋಡಲ್ಲಿ!" ಎಂದ ರಾಷ್ಟ್ರಕವಿ ಕುವೆಂಪು ಅವರು ರೈತರ ಇಂದಿನ ಬವಣೆಯನ್ನು ನೋಡಿ ಈ ಮುಂದಿನಂತೆ ಉದ್ಗರಿಸುತ್ತಿದ್ದರೋ ಏನೋ:

"ನೇಗಿಲ ಹಿಡಿದು ಮುಗಿಲ ನೋಡುತ ಆಳುವ ರೈತನ ನೋಡಲ್ಲಿ!"

-ಶ್ರೀ ತರಳಬಾಳು ಜಗದ್ಗುರು
ಡಾ|| ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು
ಸಿರಿಗೆರೆ.

ವಿಜಯ ಕರ್ನಾಟಕ 
ಬಿಸಿಲು ಬೆಳದಿಂಗಳು ದಿ: 16.3.2017