ಶಿಷ್ಯರೊಬ್ಬರು ದರ್ಶನಾಶೀರ್ವಾದ ಪಡೆಯಲೆಂದು ಕಳೆದ ವಾರ ಮಠಕ್ಕೆ ಸಕುಟುಂಬ ಪರಿವಾರ ಬಂದಿದ್ದರು. ಅವರನ್ನು ಹಿಂದೆಂದೂ ನೋಡಿದ ನೆನಪಿರಲಿಲ್ಲ. ಹಣ್ಣು ಹಾರ ಅರ್ಪಣೆ ಮಾಡಿ ಕಾಣಿಕೆ ಕೊಟ್ಟು ಶ್ರದ್ಧಾ ಭಕ್ತಿಯಿಂದ ನಮಸ್ಕರಿಸಿದರು. ಮೇಲೆದ್ದು ತಮ್ಮ ಪರಿಚಯವನ್ನು ಮಾಡಿಕೊಂಡರು. ಅವರು ಹಿಂದುಳಿದ ವರ್ಗಕ್ಕೆ ಸೇರಿದ ಕಡುಬಡತನದ ಕುಟುಂಬದಲ್ಲಿ ಜನಿಸಿದವರು. ಸುಮಾರು 60 ವರ್ಷಗಳ ಹಿಂದೆ ಸಿರಿಗೆರೆಯ ಪ್ರೌಢಶಾಲೆಯಲ್ಲಿ ಓದಿದ ವಿದ್ಯಾರ್ಥಿ. ನಮ್ಮ ಗುರುವರ್ಯರ ಪ್ರೋತ್ಸಾಹದಿಂದ ಮುಂದೆ ಓದಿ ವೈದ್ಯಕೀಯ ಶಿಕ್ಷಣ ಪಡೆದು ಡಾಕ್ಟರಾಗಿ ಈಗ ನಿವೃತ್ತಿ ಹೊಂದಿದವರು. ಲಿಂಗೈಕ್ಯ ಗುರುವರ್ಯರ ಆಶೀರ್ವಾದದಿಂದ ತನ್ನ ಮಗನೂ ಡಾಕ್ಟರು; ಸೊಸೆಯೂ ಡಾಕ್ಟರು ಎಂದು ಕುಟುಂಬದ ಸದಸ್ಯರೆಲ್ಲರ ಪರಿಚಯ ಮಾಡಿಕೊಟ್ಟು ಧನ್ಯತೆಯ ಭಾವ ವ್ಯಕ್ತಪಡಿಸಿದರು. ವೈದ್ಯರಾಗಿ ನಿವೃತ್ತರಾದ ಮೇಲೆ ಒಂದು ಡೈರಿಯನ್ನು ಆರಂಭಿಸಿರುವ ವಿಷಯ ತಿಳಿಸಿ ಮಠಕ್ಕೆ ದಾನವಾಗಿ ಕೊಡಲು ಹಾಲು ಕರೆಯುವ ಎರಡು ಹಸುಗಳನ್ನು ತಂದಿದ್ದೇನೆ ಸ್ವೀಕರಿಸಬೇಕೆಂದು ನಿವೇದಿಸಿಕೊಂಡರು. ಒಂದೊಂದಕ್ಕೂ 75 ಸಾವಿರ ರೂ. ಬೆಲೆಯುಳ್ಳ ರಾಜಸ್ಥಾನದ "ಗೀರ್" ಎಂಬ ವಿಶೇಷ ತಳಿಯ ಹಸುಗಳವು. ನಮ್ಮ ಬಿಡಾರದ ಮುಂಭಾಗದಲ್ಲಿ ವಾಹನದ ಮೇಲೆ ತನ್ನ ಕರುವನ್ನು ನೆಕ್ಕುತ್ತಾ ನಿಂತಿದ್ದ ದೃಢಕಾಯದ ಕೆಂಬಣ್ಣದ ಹಸುವಿನ ಮಾತೃವಾತ್ಸಲ್ಯ, ಒಂದೆಡೆ ಕಣ್ಣಿಗೆ ಗೋಚರಿಸಿದರೆ ಮತ್ತೊಂದೆಡೆ ಅವುಗಳನ್ನು ಮಠಕ್ಕೆ ದಾನವಾಗಿ ಕೊಡಲು ಬಯಸಿ ಕೈಜೋಡಿಸಿ ನಿಂತಿದ್ದ ಆ ಶಿಷ್ಯರ ಗುರುಭಕ್ತಿ ಹೃದಯವನ್ನು ತಟ್ಟುವಂತಿತ್ತು!

ಆದರೆ ಆ "ಗುರುಭಕ್ತಿ"ಯ ಹಿಂದೆ ವ್ಯಾವಹಾರಿಕ ಭಕ್ತಿ ಅಡಗಿದೆ ಎಂದು ಗ್ರಹಿಸಲು ಬಹಳ ಸಮಯ ಬೇಕಾಗಲಿಲ್ಲ. ಮಾತಿನ ಪ್ರಸಂಗದಲ್ಲಿಅವರು "ಬಹಳ ಜನರು ನನ್ನ ಮಗನನ್ನು ಮುಂಬರುವ ಚುನಾವಣೆಯಲ್ಲಿ ಸ್ಪರ್ಧಿಸಲು ಒತ್ತಾಯ ಮಾಡುತ್ತಿದ್ದಾರೆ. ಇನ್ನೂ ನಿರ್ಧಾರ ಮಾಡಿಲ್ಲ. ನಮ್ಮದು ಮೀಸಲು ಕ್ಷೇತ್ರ. ತಮ್ಮ ಆಶೀರ್ವಾದವಾದರೆ ನಿಲ್ಲುತ್ತಾನೆ" ಎಂದಾಗ ಅವರ ದಾನವನ್ನು ಸ್ವೀಕರಿಸಬೇಕೇ ಬೇಡವೇ? ಎಂಬ ಸಂದಿಗ್ಧತೆ ಉಂಟಾಯಿತು. ಮಠಕ್ಕೆ ನೀಡುವ ದಾನಕ್ಕೂ ಚುನಾವಣೆಗೂ ಯಾವ ಸಂಬಂಧವೂ ಇಲ್ಲ ನಿಜ, ಆದರೆ ಜಗಳೂರು ವಿಧಾನಸಭಾ ಕ್ಷೇತ್ರದಲ್ಲಿ ಪರಿಶುದ್ಧ ಚುನಾವಣೆಗೆ ಕರೆಯನ್ನಿತ್ತ ಸಂದರ್ಭದಲ್ಲಿ ಬೇರೊಂದು ಕ್ಷೇತ್ರದವರಾದರೂ ಈ ದಾನವನ್ನು ಸ್ವೀಕರಿಸಿದರೆ ಅಪಾರ್ಥಕ್ಕೆ ಎಡೆಮಾಡಿಕೊಡುವುದಿಲ್ಲವೇ? ಗುರುಗಳೇ ಮಠಕ್ಕೆ ಲಕ್ಷಾಂತರ ರೂ. ಬೆಲೆಯ ಹಸುಗಳನ್ನು ಅಭ್ಯರ್ಥಿಗಳಿಂದ ಪಡೆಯಬಹುದಾದರೆ ಬಡವರಾದ ನಾವು ನಮ್ಮ ಕುಟುಂಬದ ನಿರ್ವಹಣೆಗೆ ಅಲ್ಪ ಸ್ವಲ್ಪ ಹಣವನ್ನು ಪಡೆದರೆ ತಪ್ಪೇನು ಎಂದು ಜನರು ಕೇಳಬಹುದಲ್ಲವೇ? ಆಮಿಷವೇ ಬೇರೆ ದಾನವೇ ಬೇರೆ ಎಂಬ ವಾದ ಇಂತಹ ಸಂದರ್ಭಗಳಲ್ಲಿ ಒಣ ತರ್ಕವಾಗಬಹುದೇ ಹೊರತು ಸಾರ್ವಜನಿಕರ ಸಂದೇಹವನ್ನು ಸಂಪೂರ್ಣವಾಗಿ ನಿವಾರಿಸುವುದಿಲ್ಲ. ಕೈಗೊಂಡ ಆದರ್ಶಕ್ಕೆ ಅಡೆತಡೆ ಉಂಟಾಗದೇ ಇರುವುದಿಲ್ಲ. ಈ ಹಿನ್ನೆಲೆಯಲ್ಲಿ ಅವರ ದಾನವನ್ನು ಸ್ವೀಕರಿಸಬಾರದೆಂಬ ತೀರ್ಮಾನಕ್ಕೆ ಬಂದರೂ ಭಕ್ತಿಯಿಂದ ತಂದ ಹಸುಗಳನ್ನು (ಆ ಭಕ್ತಿ ಪ್ರಶ್ನಾರ್ಹವೇ ಆಗಿದ್ದರೂ) ವಾಪಾಸು ತೆಗೆದುಕೊಂಡು ಹೋಗುವಂತೆ ಹೇಳುವುದು ಸಮಂಜಸವಾಗಿ ತೋರಲಿಲ್ಲ.

ಚುನಾವಣೆಗೆ ನಿಲ್ಲಲು ಜನರು ಬಹಳ ಒತ್ತಾಯ ಮಾಡುತ್ತಾರೆಂದರೆ ಅವರನ್ನು ನಂಬುವುದು ಕಷ್ಟ. ನಿಮ್ಮಿಂದಲೂ ಹಣ ಕೀಳುತ್ತಾರೆ, ಬೇರೆಯವರಿಂದಲೂ ಕೀಳುತ್ತಾರೆ. ಹಣಕಾಸಿನಲ್ಲಿ ಸ್ಥಿತಿವಂತರಾದ ನಿಮ್ಮನ್ನು ದಿವಾಳಿ ಎಬ್ಬಿಸುವ ಹುನ್ನಾರವಿರುವ ಹಿತಶತ್ರುಗಳೂ ಸಹ ಇರುತ್ತಾರೆ. ವೃತ್ತಿಯಿಂದ ವೈದ್ಯರಾಗಿ ಬಡರೋಗಿಗಳ ಸೇವೆಯನ್ನು ಮಾಡಲು ಬರುವಾಗ ಕೋಟ್ಯಂತರ ರೂ. ಖರ್ಚು ಮಾಡಿ ರಾಜಕೀಯ ರಂಗ ಪ್ರವೇಶ ಮಾಡುವ ತುಡಿತ ಏಕೆ? ಎಂದು ಅವರನ್ನು ಪ್ರಶ್ನಿಸಿದಾಗ ತಾವು ದಾನವನ್ನು ಸ್ವೀಕರಿಸದಿದ್ದರೆ ಚುನಾವಣೆಗೆ ನಿಲ್ಲುವ ಗೋಜಿಗೆ ಹೋಗುವುದಿಲ್ಲ ಎಂದು ಉದ್ಧರಿಸಿದರು. ಚುನಾವಣೆಗೆ ನಿಲ್ಲಬೇಕೆಂಬ ಮನಸ್ಸಿನಿಂದಲೇ ನಮ್ಮ ಆಶೀರ್ವಾದ ಪಡೆಯಲು ಬಂದಿದ್ದ ಅವರನ್ನು ಹತಾಶಗೊಳಿಸುವುದು ಸರಿಯಲ್ಲವೆನಿಸಿತು. ಪ್ರಜಾಪ್ರಭುತ್ವದಲ್ಲಿ ಚುನಾವಣೆಗೆ ನಿಲ್ಲುವ ಹಕ್ಕು ಎಲ್ಲರಿಗೂ ಇರುವಂತೆ ಅವರಿಗೂ ಇದೆ. ಆದರೆ ಇಂದಿನ ಭ್ರಷ್ಟ ಚುನಾವಣಾ ವ್ಯವಸ್ಥೆಯಲ್ಲಿ ಕಷ್ಟಪಟ್ಟು ಪ್ರಾಮಾಣಿಕವಾಗಿ ಸಂಪಾದನೆ ಮಾಡಿದ ಹಣವನ್ನು ಕಳೆದುಕೊಳ್ಳುತ್ತಾರಲ್ಲಾ ಎಂಬ ಅನುಕಂಪ ನಮ್ಮದಾಗಿತ್ತು. ಹಣ ಖರ್ಚು ಮಾಡಿ ಗೆದ್ದರೆ ಭ್ರಷ್ಟಮಾರ್ಗ ಹಿಡಿಯಬೇಕಾಗುತ್ತದೆ. ಸೋತರೆ ಹಣ ಕಳೆದುಕೊಂಡು ನೆಮ್ಮದಿ ಹಾಳಾಗುತ್ತದೆ. ರಾಜಕೀಯದಲ್ಲಿ ಒಳ್ಳೆಯ ನಾಯಕರು ಬೇಕು, ಅದಕಾರಣ ಚುನಾವಣೆಗೆ ನಿಲ್ಲುವ ನಿರ್ಧಾರದಿಂದ ಹಿಂದೆಗೆಯುವುದು ಬೇಡ, ಭ್ರಷ್ಟಮಾರ್ಗ ಹಿಡಿಯದೆ ಚುನಾವಣೆ ನಡೆಸಿರಿ. ಗೆದ್ದರೆ ಪ್ರಾಮಾಣಿಕವಾಗಿ ಜನರ ಸೇವೆ ಮಾಡಿರಿ ಎಂದು ಅವರಿಗೆ ಹೇಳಿದಾಗ ಗುರುಗಳು ದಾನವನ್ನು ಸ್ವೀಕರಿಸುತ್ತಾರೆಂಬ ಆಶಾಭಾವನೆ ಅವರ ಮನಸ್ಸಿನಲ್ಲಿ ಚಿಗುರಿತು.

ಆದರೆ ನಮ್ಮ ನಿರ್ಧಾರವೇ ಬೇರೆಯಾಗಿತ್ತು. ಅವರು ದಾನವಾಗಿ ಕೊಡಲು ತಂದಿದ್ದ ಹಸುಗಳನ್ನು ದಾನವಾಗಿ ಪಡೆಯದೆ ಖರೀದಿಸುವುದಾಗಿ ಹೇಳಿದಾಗ ಅವರು ಒಪ್ಪಲಿಲ್ಲ. ಆದರೂ ಅವರಿಗೆ ತಿಳಿ ಹೇಳಿ ಆ ಎರಡೂ ಹಸುಗಳ ಒಟ್ಟು ಮೌಲ್ಯ ಒಂದು ಲಕ್ಷದ ಐವತ್ತು ಸಾವಿರ ರೂ. ಗಳಿಗೆ ಚೆಕ್ಕನ್ನು ನೀಡಿದಾಗ ಅವರು ಮನಸ್ಸಿಲ್ಲದ ಮನಸ್ಸಿನಲ್ಲಿ ಸ್ವೀಕರಿಸಿದರು. ಹಸುಗಳನ್ನು ಹಿಂದಿರುಗಿಸಿ ಅವರ ಮನಸ್ಸಿಗೆ ನೋವುಂಟುಮಾಡಬಾರದೆಂಬ ಉತ್ಕಟೇಚ್ಛೆ ನಮ್ಮದಾಗಿದ್ದರೂ ಆ ಶಿಷ್ಯರ ಮನಸ್ಸಿನ ಮೂಲೆಯಲ್ಲಿ ಅವ್ಯಕ್ತವಾದ ನೋವು ಅಡಗಿತ್ತು!

ಇನ್ನೂ ಹೆಚ್ಚಿನ ನೋವು ನಮ್ಮನ್ನು ಕಾದಿತ್ತು. ಮಾರನೆಯ ದಿನ ಜಗಳೂರು ವಿಧಾನಸಭಾ ಕ್ಷೇತ್ರದಲ್ಲಿ ಪರಿಶುದ್ಧ ಚುನಾವಣೆಯನ್ನು ನಡೆಸಲು ಪ್ರಾಯೋಗಿಕವಾಗಿ ಅನುಸರಿಸಬೇಕಾದ ವಿಷಯದಲ್ಲಿ ಚರ್ಚಿಸಿ ನಿರ್ಣಯಿಸಬೇಕಾದ ನಿರ್ಣಾಯಕ ಸಭೆಗೆ ಎಂದಿನಂತೆ ಎಲ್ಲ ಪಕ್ಷಗಳ ಸಂಭವನೀಯ ಅಭ್ಯರ್ಥಿಗಳೂ, ಬೆಂಬಲಿಗರೂ ಕ್ಷೇತ್ರದ ಜಿಲ್ಲಾ ಪಂಚಾಯಿತಿ, ತಾಲ್ಲೂಕು ಪಂಚಾಯಿತಿ, ಎ.ಪಿ.ಎಂ.ಸಿ. ಸದಸ್ಯರೂ, ಮಾಜಿ ಸದಸ್ಯರೂ, ಪರಾಜಿತರೂ ಹಾಗೂ ವಿವಿಧ ಪಕ್ಷಗಳ ಮುಖಂಡರೂ ಹೆಚ್ಚಿನ ಸಂಖ್ಯೆಯಲ್ಲಿ ಹಾಜರಾಗಿದ್ದರು. ಹಿಂದಿನ ಎಲ್ಲ ಸಭೆಗಳಲ್ಲಿ ಇಡೀ ದೇಶಕ್ಕೆ ಮಾದರಿಯಾದ ಚುನಾವಣೆಯನ್ನು ನಡೆಸಬೇಕೆಂದುಪಣ ತೊಟ್ಟು ವೀರಾವೇಶದಿಂದ ಮಾತನಾಡಿದ್ದ ಈ ರಾಜಕೀಯ ಧುರೀಣರು ಅಂದು ಪಕ್ಷಭೇದವಿಲ್ಲದೆ ಯು ಟರ್ನ್ ಹೊಡೆದು ಮಾತನಾಡಿದರು. ಜಗಳೂರನ್ನೇ ಗುರುಗಳು ಏಕೆ ಆಯ್ಕೆ ಮಾಡಿಕೊಂಡಿದ್ದಾರೆ? ಚನ್ನಗಿರಿ, ಹೊಳಲ್ಕೆರೆ, ದಾವಣಗೆರೆ ಕ್ಷೇತ್ರಗಳನ್ನು ಏಕೆ ಆಯ್ಕೆ ಮಾಡಿಕೊಂಡಿಲ್ಲ? ಸುತ್ತಮುತ್ತಲ ಕ್ಷೇತ್ರಗಳಲ್ಲಿ ವ್ಯಾಪಕವಾಗಿ ಚುನಾವಣಾ ಭ್ರಷ್ಟಾಚಾರ ನಡೆಯುವಾಗ ಜಗಳೂರು ಕ್ಷೇತ್ರ ಮಾತ್ರ ಹೇಗೆ ಭ್ರಷ್ಟತೆಯಿಂದ ಮುಕ್ತವಾಗಿರಲು ಸಾಧ್ಯ? ಎಂದೆಲ್ಲಾ ಜನರು ಮಾತನಾಡುತ್ತಿದ್ದಾರೆ. ನಮಗೆ ಗುರುಗಳವರ ಆದೇಶದಂತೆ ನಡೆಯುವ ಇಚ್ಛೆ ಇದ್ದರೂ ಜನರು ಈ ರೀತಿ ಕೊಂಕು ಮಾತನಾಡಿಕೊಳ್ಳುವುದನ್ನು ಕೇಳಿ ದಿಕ್ಕು ತೋಚದಂತಾಗಿದೆ ಎಂದರು. ಇದು ಹೇಗಿದೆಯೆಂದರೆ ಹೆಣ್ಣನ್ನು ನೋಡಿಕೊಂಡು ಹೋದ ಗಂಡಿನ ತಂದೆತಾಯಿಗಳು "ನಿಮ್ಮ ಮಗಳನ್ನೇ ನಮ್ಮ ಮನೆಯ ಸೊಸೆಯನ್ನಾಗಿ ಮಾಡಿಕೊಳ್ಳಬೇಕೆಂದು ನಮಗೆ ಬಹಳವಾದ ಆಸೆ ಇತ್ತು, ಆದರೆ ಏನು ಮಾಡುವುದು ನಮ್ಮೂರ ಹನುಮಪ್ಪ ದೇವರು ವರ ಕೊಡುತ್ತಿಲ್ಲ!" ಎಂದು ಆಪ್ತೇಷ್ಟರ ಮುಖಾಂತರ ಹೇಳಿಕಳುಹಿಸಿದಂತಿದೆ. ಅವರು ಕೇಳಿದಷ್ಟು ವರದಕ್ಷಿಣೆಯನ್ನು ಹೆಣ್ಣು ಹೆತ್ತವರು ಕೊಟ್ಟರೆ ಈಗಲೂ ಸಿದ್ದ! ಚುನಾವಣಾ "ವರದಕ್ಷಿಣೆ" ಬೇಕಾಗಿರುವುದು ಜನಸಾಮಾನ್ಯರಿಗಲ್ಲ. ಅಭ್ಯರ್ಥಿಗಳನ್ನು ಕುಣಿಸುವ ಅಸಾಮಾನ್ಯರಿಗೆ. ಇದು ಆದರ್ಶಪಥದಲ್ಲಿ ಅಡಿ ಇಡಲು ವ್ಯಾವಹಾರಿಕವಾಗಿ ಸಿದ್ಧರಿಲ್ಲದ ಎಲ್ಲ ಪಕ್ಷಗಳ ಬೆಂಬಲಿಗರ ಮನಃಸ್ಥಿತಿ.

ಸ್ವಾತಂತ್ರಕ್ಕಾಗಿ ನಡೆದ ಹೋರಾಟದ ಸಂದರ್ಭವನ್ನು ನೆನಪಿಸಿಕೊಳ್ಳಿ. ಸೂರ್ಯ ಮುಳುಗದ ಸಾಮ್ರಾಜ್ಯದ ದೈತ್ಯ ಮಿಲಿಟರಿ ಶಕ್ತಿಯ ಎದುರು ತೊಡೆ ತಟ್ಟಿ ನಿಂತದ್ದು ಈ ದೇಶದ ಜನರೇ ಅಲ್ಲವೆ! ಲಾಠಿ ಏಟು ತಿಂದವರು, ಪೊಲೀಸರ ಗುಂಡೇಟಿಗೆ ಎದೆಯೊಡ್ಡಿ ಹುತಾತ್ಮರಾದವರು ಇದೇ ದೇಶದ ಜನರಲ್ಲವೆ! ಚುನಾವಣೆಯನ್ನು ಭ್ರಷ್ಟಾಚಾರದಿಂದ ಮುಕ್ತಗೊಳಿಸಲು ಯಾರೂ ಪ್ರಾಣ ತೆರಬೇಕಾಗಿಲ್ಲ. ಅಧಿಕಾರದ ಮೋಹ ಬಿಡಬೇಕಾಗಿದೆ, ಅಷ್ಟೆ. ಅದಕ್ಕಾಗಿ ಜನಾಭಿಪ್ರಾಯ ರೂಪುಗೊಳ್ಳಬೇಕಾಗಿದೆ ಜನಾಂದೋಲನ ಆರಂಭವಾಗಬೇಕಾಗಿದೆ. ಇದನ್ನು ಸಾಧ್ಯವಾಗಿಸುವುದು ದೇಶದ ಭವಿಷ್ಯದ ಬಗೆಗೆ ಚಿಂತಿಸುವ ಎಲ್ಲಪ್ರಜ್ಞಾವಂತರ ಕರ್ತವ್ಯ. ರಾಷ್ಟ್ರಕವಿ ಕುವೆಂಪು ಅವರು ಬರೆದ ಕೆಳಕಂಡ ಕವಿತೆ ಈ ವೈಪರೀತ್ಯವನ್ನು ಕುರಿತೇ ಇರಬೇಕು:

ಹಿಂದೊಬ್ಬ ಗುರುವಿದ್ದ ಮುಂದೊಂದು ಗುರಿ ಇತ್ತು 
ಸಾಗಿತ್ತು ರಣಧೀರರ ದಂಡು!
ಹಿಂದೆ ಗುರುವಿಲ್ಲ ಮುಂದೆ ಗುರಿಯಿಲ್ಲ 
ಸಾಗುತಿದೆ ರಣಹೇಡಿಗಳ ಹಿಂಡು!

-ಶ್ರೀ ತರಳಬಾಳು ಜಗದ್ಗುರು
ಡಾ|| ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು
ಸಿರಿಗೆರೆ.

ವಿಜಯ ಕರ್ನಾಟಕ 
ಬಿಸಿಲು ಬೆಳದಿಂಗಳು ದಿ: 29.3.2018