ಮೊನ್ನೆ ಮೊನ್ನೆ ಇಂಗ್ಲೀಷಿನಲ್ಲಿ ಓದಿದ ರೋಚಕವಾದ ಒಂದು ಸಣ್ಣಕಥೆ. ಅದನ್ನು ಆಧರಿಸಿ ನಮ್ಮ ಕಲ್ಪನೆಯ ಗರಿಗೆದರಿ ಸೂಕ್ತ ಕಂಡಂತೆ ಬದಲಾವಣೆ ಮಾಡಿ ರೂಪಾಂತರಗೊಳಿಸಿ ಸ್ವತಂತ್ರವಾಗಿ ಹೆಣೆದ ಪ್ರಹಸನವೇ ಈ ಲೇಖನ: ಸ್ವತಂತ್ರ ಭಾರತದಲ್ಲಿ ಸತತ ಐದು ಅಸೆಂಬ್ಲಿ ಚುನಾವಣೆಗಳನ್ನು ಎದುರಿಸಿ ಹ್ಯಾಟ್ರಿಕ್ ಸಾಧಿಸಿದ್ದ "ಜನಪ್ರಿಯ ಶಾಸಕ"ನಿಗೆ ಈ ಬಾರಿ ಅದೇಕೋ ಏನೋ ಟಿಕೆಟ್ ಸಿಗಲಿಲ್ಲ. ಅವನ ಮಗನಿಗೂ ಸಿಗಲಿಲ್ಲ. ಸಿಟ್ಟಿಗೆದ್ದ ಆ ರಾಜಕೀಯ ನೇತಾರ ತನ್ನ ಶಕ್ತಿ ಏನಿದೆಯೆಂಬುದನ್ನು ತೋರಿಸಿಕೊಡುತ್ತೇನೆಂದು ಪಕ್ಷದ ವಿರುದ್ಧ ಸೆಡ್ಡು ಹೊಡೆದು ಮೊನ್ನೆ ತಾನೆ ಪಕ್ಷೇತರನಾಗಿ ನಾಮಿನೇಷನ್ ಫೈಲ್ ಮಾಡಿ ಮಲಗಿದ್ದ. ರಕ್ತದೊತ್ತಡ ಹೆಚ್ಚಾಗಿ ಹಠಾತ್ತನೆ ಹೃದಯಾಘಾತ ಸಂಭವಿಸಿ ಅರೆನಿದ್ರೆಯಿಂದ ಚಿರನಿದ್ರೆಗೆ ಜಾರಿದ. ಯಮದೂತರು ಅವನ ಪ್ರೇತಾತ್ಮವನ್ನು ಅರೆಸ್ಟ್ ಮಾಡಿ ತಮ್ಮ KON-420 (ಕೋಣ?) ನಂಬರಿನ ಜೀಪಿನಲ್ಲಿ ಹಾಕಿಕೊಂಡು ಹೋದರು. ದಾರಿಯುದ್ದಕ್ಕೂ ಯಮದೂತರ ಮೇಲೆ ರಾಜಕಾರಣಿಯ ವಾಗ್ದಾಳಿ ನನ್ನನ್ನು ಅರೆಸ್ಟ್ ಮಾಡಲು ನಿಮಗೇನು ಅಧಿಕಾರವಿದೆ? ನಿಮ್ಮ ಐಡಿ ಕಾರ್ಡ್ ತೋರಿಸಿ. ಯಾವ ಕೋರ್ಟಿನಿಂದ ವಾರಂಟ್ ತಂದಿದ್ದೀರಿ? ಇತ್ಯಾದಿಯಾಗಿ ಜೋರು ಮಾಡುತ್ತಲೇ ಇದ್ದ. ಯಮದೂತರು ಅವನ ಆರ್ಭಟಕ್ಕೆ ಸೊಪ್ಪು, ಹಾಕದೆ silent ಆಗಿ ನರಕದ ಹೆಬ್ಬಾಗಿಲಿನ ಮುಂದೆ ತಂದು ನಿಲ್ಲಿಸಿದರು.

ನರಕದ ಆಫೀಸು ಇನ್ನೂ ಆರಂಭವಾಗಿರಲಿಲ್ಲ. ಈ ಮೊದಲು ಎಳೆದು ತಂದಿದ್ದ ಇನ್ನೂ ಮೂವರು ಅಲ್ಲಿಯೇ ಕಾಯುತ್ತಿದ್ದರು. ಚಿತ್ರಗುಪ್ತ ಸ್ನಾನ ಪೂಜೆ ಮಾಡಿ ತಿಂಡಿ ತಿಂದು ಆಫೀಸಿಗೆ ಹೊರಡುವ ಸಿದ್ಧತೆಯಲ್ಲಿದ್ದ. ಮೊಬೈಲ್ ರಿಂಗಣಿಸಿತು. ಆಗಲೇ ಮೂರು missed call ಗಳು ಇದ್ದವು. ಯಮದೂತರಿಂದ ಬಂದ SMS ನೋಡಿಕೊಂಡ. ತಕ್ಷಣವೇ ನರಕದ ಹೆಬ್ಬಾಗಿಲಿನ ದ್ವಾರಪಾಲಕರಿಗೆ ಫೋನಾಯಿಸಿ ಆ ನಾಲ್ಕೂ ಜನರ ದಾಖಲೆಗಳನ್ನು ಪರಿಶೀಲಿಸಲು ಆಜ್ಞಾಪಿಸಿದ. 1) ಮೊದಲನೆಯವನು ಸಾಹಿತಿ. ಅವನು ಸಾಹಿತ್ಯ ಅಕಾಡೆಮಿಯಿಂದ ಪ್ರಶಸ್ತಿ ಪಡೆದ ತನ್ನ ಪುಸ್ತಕದ ಪ್ರತಿಯನ್ನು ಕೈಯಲ್ಲಿ ತೆಗೆದುಕೊಂಡೇ ಬಂದಿದ್ದ. ದ್ವಾರಪಾಲಕನೊಬ್ಬ ನರಕದಲ್ಲಿ ನೌಕರಿ ಸಿಗುವ ಮೊದಲು ಭೂಲೋಕದಲ್ಲಿ ಓದುತ್ತಿದ್ದಾಗ ಅವನ ವಿದ್ಯಾರ್ಥಿಯಾಗಿದ್ದ. ತನಗೆ ಪಾಠ ಹೇಳಿದ ಮೇಷ್ಟ್ರು ಎಂಬ ಕೃತಜ್ಞತೆಯಿಂದ "ನಮಸ್ಕಾರ ಸಾರ್" ಎಂದು ಅವರನ್ನು ಹೆಚ್ಚು ತಪಾಸಣೆ ಮಾಡದೆ ಸೀದಾ ಸ್ವರ್ಗಕ್ಕೆ ಕಳುಹಿಸಿದ. 2) ಎರಡನೆಯವನು ಅಕ್ಕಸಾಲಿಗ ಕಲಾಕುಸುರಿಯಲ್ಲಿ ತನಗಿರುವ ನೈಪುಣ್ಯವನ್ನು ಪ್ರದರ್ಶಿಸಲು ಅವನು ಮೂರು ಅಪರೂಪದ ಚಿನ್ನಾಭರಣಗಳನ್ನು ಜೊತೆಯಲ್ಲಿ ತಂದಿದ್ದ. ಅದು ಅಸಲಿ ಚಿನ್ನವೋ ಅಥವಾ ನಕಲಿಯೋ ಎಂಬುದನ್ನು ಇನ್ನೊಬ್ಬ ದ್ವಾರಪಾಲಕ ಪರಿಶೀಲಿಸಿ ಖಚಿತಪಡಿಸಿಕೊಂಡು ಚಿನ್ನಾಭರಣಗಳನ್ನು ಅವನಿಗೆ ವಾಪಾಸುಕೊಟ್ಟು ಸ್ವರ್ಗಕ್ಕೆ ಕಳುಹಿಸಿಕೊಟ್ಟ. ಅಕ್ಕಸಾಲಿಗ ಖುಷಿಯಿಂದ ಸ್ವರ್ಗಾರೋಹಣ ಮಾಡಿದ ಮೇಲೆ ನೋಡಿಕೊಂಡಾಗ ದಿಗ್ಭ್ರಮೆಯಾಯಿತು. ಅವನ ಕೈಯಲ್ಲಿ ಮೂರು ಚಿನ್ನಾಭರಣಗಳ ಬದಲು ಎರಡೇ ಇದ್ದವು! ತನ್ನ ಅಂತ್ಯಕ್ರಿಯೆ ಸಂದರ್ಭದಲ್ಲಿ ತನ್ನ ಮೈಮೇಲಿದ್ದ ಚಿನ್ನಾಭರಣಗಳ ಮೇಲೆಯೇ ದೃಷ್ಟಿ ನೆಟ್ಟಿದ್ದ ಹೆಂಡತಿ ಮಕ್ಕಳು ಮತ್ತು ಬಂಧುಬಾಂಧವರ ಕಣ್ಣು ತಪ್ಪಿಸಿ ಹೇಗೋ ಕಷ್ಟಪಟ್ಟು ಮೂರನ್ನು ತಂದಿದ್ದ. ಹಿಂದಿರುಗಿ ಹೋಗಿ ಕೇಳಿದರೆ ಎಲ್ಲಿ ತನ್ನನ್ನು ದ್ವಾರಪಾಲಕ ನರಕಕ್ಕೆ ತಳ್ಳುತ್ತಾನೋ ಎಂಬ ಭೀತಿಯಿಂದ ಸುಮ್ಮನಾದ. 3) ಮೂರನೆಯವನು ಡಾಕ್ಟರು. ದ್ವಾರಪಾಲಕ ಅವರ ದಾಖಲೆಗಳನ್ನು ಪರಿಶೀಲಿಸುವಾಗ ಭೂಲೋಕದಲ್ಲಿ ತನ್ನ ತಾಯಿಗೆ ಹಾರ್ಟ್ ಆಪರೇಷನ್ ಮಾಡಿ ಜೀವ ಉಳಿಸಿದ ಡಾಕ್ಟರು ಇವರೇ ಎಂದು ತಿಳಿದು "ವೈದ್ಯೋ ನಾರಾಯಣೋ ಹರಿಃ” ಎಂದು ಅವರಿಗೆ ನಮಸ್ಕರಿಸಿ ಸ್ವರ್ಗಕ್ಕೆ ಕಳುಹಿಸಿಕೊಟ್ಟ. 4)ಇನ್ನು ನಾಲ್ಕನೆಯವನು ರಾಜಕಾರಣಿ, ಚುನಾವಣೆಯಲ್ಲಿ ಪಕ್ಷೇತರ ಅಭ್ಯರ್ಥಿಯಾದ ಅವನ ಹತ್ತಿರ ಯಾವ ಸರ್ಟಿಫಿಕೇಟುಗಳೂ ಇರಲಿಲ್ಲ. ದ್ವಾರಪಾಲಕರು ಕೇಳಿದಾಗ ಎಲ್ಲಾ ಸರ್ಟಿಫಿಕೇಟುಗಳನ್ನೂ ಮೊನ್ನೆ ತಾನೆ ನಾಮಿನೇಷನ್ ಫೈಲ್ ಮಾಡುವಾಗ ಚುನಾವಣಾಧಿಕಾರಿಯ ಕೈಯಲ್ಲಿ ಕೊಟ್ಟಿರುವುದಾಗಿ ಹೇಳಿದ. ದ್ವಾರಪಾಲಕರು ಹುಬ್ಬುಗಂಟಿಕ್ಕಿ ಅವನಿಗೆ ನರಕದ ಬಾಗಿಲುತೋರಿಸಿದರು. ಮುಂದೆ ಇದ್ದ ಮೂವರನ್ನು ಸ್ವರ್ಗಕ್ಕೆ ಕಳುಹಿಸಿ, ತನ್ನನ್ನು ನರಕಕ್ಕೆ ತಳ್ಳಿದ್ದರಿಂದ ಮತ್ತಷ್ಟೂ ಕ್ರುದ್ಧನಾದ ಆ ರಾಜಕಾರಣ ಸಿಕ್ಕಾಪಟ್ಟೆ ಕೂಗಾಡತೊಡಗಿದ. “ಆ ಮೂವರಿಗೂ ಕೆಲಸ ಕೊಡಿಸಿದವನು ನಾನೇ. ನಿಮ್ಮನ್ನು ಸುಮ್ಮನೆ ಬಿಡುವುದಿಲ್ಲ. ನನ್ನನ್ನು ಏನೆಂದು ತಿಳಿದುಕೊಂಡಿದ್ದೀರಿ? ನಿಮ್ಮೆಲ್ಲರನ್ನೂ ಸಸ್ಪೆಂಡ್ ಮಾಡಿಸುತ್ತೇನೆ, ಕೆಲಸದಿಂದ ವಜಾ ಮಾಡಿಸುತ್ತೇನೆ, ಇಲ್ಲವೇ ಭೂಲೋಕಕ್ಕೆ ನೀರಿಲ್ಲದ ಕಡೆಗೆ ವರ್ಗಮಾಡಿಸುತ್ತೇನೆ" ಎಂದು ಧಮಕಿ ಹಾಕಿದ. ಅಷ್ಟರೊಳಗೆ ಚಿತ್ರಗುಪ್ತ ಬಂದ. ರಾಜಕಾರಣಿಯ ಆರ್ಭಟ ಕೇಳಿ ಏನೆಂದು ದ್ವಾರಪಾಲಕರನ್ನು ವಿಚಾರಿಸಿದ. ಅವರು ವಿವರವಾದ ವರದಿ ಕೊಟ್ಟರು. ಚಿತ್ರಗುಪ್ತ ವರದಿಯನ್ನು ಕೂಲಂಕಷವಾಗಿ ಪರಿಶೀಲಿಸಿದ.

ಚಿತ್ರಗುಪ್ತ: "ದ್ವಾರಪಾಲಕರು ಹೇಳುತ್ತಿರುವುದು ಸರಿಯಾಗಿಯೇ ಇದೆ. ನೀನು ಸ್ವರ್ಗಕ್ಕೆ ಹೋಗಲು ಅರ್ಹನಲ್ಲ, ನಿನಗೆ ನರಕವೆ  ಸರಿ".

ರಾಜಕಾರಣಿ: "ಇಲ್ಲ, ನೀನು ಮತ್ತು ನಿನ್ನ ಚೇಲಾಗಳು ನನ್ನ ರಾಜಕೀಯ ವಿರೋಧಿಗಳೊಂದಿಗೆ ಸೇರಿಕೊಂಡು ನನ್ನ ವಿರುದ್ಧ ಪಿತೂರಿ ಮಾಡಿದ್ದೀರಿ. ನಾನು ಈ ಚುನಾವಣೆಯಲ್ಲಿ ಇನ್ನೂ ಯಾವ ಅಕ್ರಮವನ್ನೂ ಎಸಗಿಲ್ಲ. ಕೇವಲ ನಾಮಪತ್ರ ಸಲ್ಲಿಸಿದ್ದೇನೆ. ಮುಂದೆ ಯಾವುದಾದರೂ "ನಿಗಮಾಗಮ"ಗಳಿಗೆ ಅಧ್ಯಕ್ಷನನ್ನಾಗಿ ಮಾಡುವುದಾಗಿ ಹೈಕಮಾಂಡಿನವರು ಭರವಸೆ ಕೊಟ್ಟರೆ ವಾಪಾಸು ತೆಗೆದುಕೊಳ್ಳಬೇಕೆಂದಿದ್ದೇನೆ. ಅಷ್ಟಕ್ಕೂ ಚುನಾವಣೆ ನೀತಿಸಂಹಿತೆಯ ಪ್ರಕಾರ ನನ್ನ ಖಾತೆಯೇ ಇನ್ನೂ ಆರಂಭವಾಗಿಲ್ಲ. ನಾಮಪತ್ರವನ್ನು ಹಿಂದಕ್ಕೆ ಪಡೆಯುವ ದಿನಾಂಕ ನಾಳೆವರೆಗೂ ಇದೆ. ಅದು ಮುಗಿದ ಮೇಲೆಯೇ ತಾನೆ ನನ್ನ ಖಾತೆಗೆ ಖರ್ಚು ಬೀಳುವುದು. ಇನ್ನೂ ಏನೂ ಖರ್ಚು ಮಾಡದ, ಯಾವ ಅಕ್ರಮವನ್ನೂ ಎಸಗದ ನನ್ನನ್ನು ವಿಚಾರ ಮಾಡದೆ ರಾತ್ರೋರಾತ್ರಿ ಅರೆಸ್ಟ್ ಮಾಡಿಕೊಂಡು ಬಂದಿರುವುದು ಅಕ್ರಮ, ಸಂವಿಧಾನ ಬಾಹಿರ. ನಿಮ್ಮ ವಿರುದ್ಧ ಕೇಂದ್ರ ಚುನಾವಣಾ ಆಯೋಗಕ್ಕೆ ದೂರು ಸಲ್ಲಿಸುತ್ತೇನೆ ಎಂದು ಏರುದನಿಯಲ್ಲಿ ಜೋರು ಮಾಡಿದ. ಈ ಹಿಂದಿನ ಚುನಾವಣೆಗಳಲ್ಲಿ ಕಂಠಪೂರ್ತಿ ಕುಡಿದು ಯಮಲೋಕ ಸೇರಿದ್ದ ಅವನ ಬೆಂಬಲಿಗರು ತಮ್ಮ ನೇತಾರನ ಏರುದನಿಯನ್ನು ಗುರುತಿಸಿ ಧಾವಿಸಿದರು. ಬಹಳ ವರ್ಷಗಳ ನಂತರ ತಮ್ಮ ನಾಯಕನನ್ನು ನೋಡಿ ಹರ್ಷಪುಳಕಿತರಾಗಿ ಜಯಕಾರ ಹಾಕಿದರು. ಅದುವರೆಗೆ ನರಕಯಾತನೆಯನ್ನು ಅನುಭವಿಸಿ ರೋಸಿಹೋಗಿದ್ದ ಅವರು "ಚಿತ್ರಗುಪ್ತನಿಗೆ ಧಿಕ್ಕಾರ, ಚಿತ್ರಗುಪ್ತನಿಗೆ ಧಿಕ್ಕಾರ!" ಎಂದು ಒಕ್ಕೊರಲಿನಿಂದ ಕೂಗಿದರು.

ರಾಜಕಾರಣಿಯ ಕೂಗು ಮತ್ತು ಅವನ ಬೆಂಬಲಿಗರು ಎಬ್ಬಿಸಿದ ಕೋಲಾಹಲವನ್ನು ಚಿತ್ರಗುಪ್ತ ತನ್ನ ಸ್ಮಾರ್ಟ್ ಫೋನಿನಲ್ಲಿ ಚಿತ್ರೀಕರಿಸಿಕೊಂಡು ವಿದೇಶ ಯಾತ್ರೆಯಲ್ಲಿದ್ದ ಯಮರಾಜನಿಗೆ ವಾಟ್ಸಾಪ್ ಮಾಡಿದ. ಯಮರಾಜನು ಚಿತ್ರಗುಪ್ತನಿಗೆ ವಾಟ್ಸಾಪ್ನಲ್ಲಿಯೇ ಫ್ರೀ ಕಾಲ್ ಮಾಡಿ ವಿವರವಾಗಿ ವಿಷಯ ತಿಳಿದುಕೊಂಡು ತಾನು ಬಂದು ಸ್ವತಃ ವಿಚಾರಣೆ ಮಾಡುವವರೆಗೂ ಆ ರಾಜಕಾರಣಿಗೆ ಯಾವ ಶಿಕ್ಷೆಯನ್ನೂ ಕೊಡುವುದು ಬೇಡ ಎಂದು ಆದೇಶ ನೀಡಿದ.

ಈ ಮಧ್ಯೆ ರಾಜಕಾರಣಿಯ ಆರ್ಭಟ ಇನ್ನೂ ಜೋರಾಯಿತು. ತನ್ನ ಬೆಂಬಲಿಗರೆಲ್ಲರನ್ನೂ ಮತ್ತು ನರಕ ಯಾತನೆ ಅನುಭವಿಸುತ್ತಿರುವ ಇತರರನ್ನೂ ಒಂದೆಡೆ ಸೇರಿಸಿ ಭಾಷಣ ಬಿಗಿದ. ಇಂದ್ರನಾಗಲೀ, ಯಮನಾಗಲೀ ಯಾರೂ ಪ್ರಜಾಸತ್ತಾತ್ಮಕ ರೀತಿಯಲ್ಲಿ ಸ್ವರ್ಗ ಮತ್ತು ನರಕದ ಅಧಿಪತಿಗಳಾಗಿ ಆಯ್ಕೆಯಾದವರಲ್ಲ. ಇವರಿಬ್ಬರೂ ಬೋಳೆ ಶಂಕರನನ್ನು ನಂಬಿಸಿ ಯಾವ ಚುನಾವಣೆಯ ಖರ್ಚೂ ಇಲ್ಲದೆ ನಾಮಿನೇಷನ್ ಮಾಡಿಸಿಕೊಂಡು ಅಧಿಕಾರಕ್ಕೆ ಬಂದವರು ಎಂದು ಆರೋಪಿಸಿದ. ಶಾಶ್ವತವಾಗಿ ಅಧಿಕಾರ ಅನುಭವಿಸುತ್ತಾ ಬಂದಿರುವ ಇವರ ವಿರುದ್ದ ನೀವು ಬಂಡೇಳದಿದ್ದರೆ ನಿಮ್ಮ ನರಕಯಾತನೆ ತಪ್ಪಿದ್ದಲ್ಲ ಎಂದು ಎಚ್ಚರಿಸಿದ. ಯಮ ಪರದೇಶ ಯಾತ್ರೆ ಮುಗಿಸಿಕೊಂಡು ಬರುವುದರೊಳಗೆ ನರಕನಿವಾಸಿಗಳೆಲ್ಲರನ್ನೂ ಸಂಘಟಿಸಿ ಸ್ವರ್ಗದ ಹೆಬ್ಬಾಗಿಲವರೆಗೂ "ಬಂಡಾಯ ಯಾತ್ರೆ" ಕೈಗೊಂಡ.

ಸ್ವರ್ಗದ ನಿವಾಸಿಗಳು ಕುತೂಹಲದಿಂದ ಹೊರಗೆ ಬಂದು ನೋಡುತ್ತಾರೆ. ರಾಜಕಾರಣಿ ಅವರೆಲ್ಲರನ್ನೂ ಉದ್ದೇಶಿಸಿ ಇಂದ್ರನ ವಿರುದ್ಧ ತನ್ನ ವಾಗ್ಬಾಣಗಳನ್ನು ಬಿಡುತ್ತಾನೆ: "ಸ್ವರ್ಗ-ನರಕ ನಿವಾಸಿಗಳಾದ ನನ್ನ ಸೋದರರೇ! ಇಂದ್ರ ಎಷ್ಟೊಂದು ವರ್ಷಗಳಿಂದ ರಂಭೆ, ಊರ್ವಶಿ, ತಿಲೋತ್ತಮೆ ಮೊದಲಾದ ಸುರಸುಂದರಿಯರೊಡನೆ ಚಕ್ಕಂದವಾಡಿಕೊಂಡು ಬಂದಿದ್ದಾನೆ. ಅಷ್ಟೇ ಅಲ್ಲದೆ ಪತಿಪರಾಯಣೆಯಾದ ಅಹಲ್ಯೆಯ ಶೀಲಭಂಗ ಮಾಡಿದ ಮೋಸಗಾರ, ನಯವಂಚಕ, ನರಕದಲ್ಲಿರಬೇಕಾದ ಇಂತಹ ನೀಚ ವ್ಯಕ್ತಿಯು ನಿಮ್ಮಂತಹ ಸಾತ್ವಿಕ ಜನರು ವಾಸವಾಗಿರುವ ಸ್ವರ್ಗದ ಅಧಿಪತಿಯಾಗಿರಲು ಹೇಗೆ ಸಾಧ್ಯ? ನೀವು ಎಲ್ಲಿಯವರೆಗೆ ಹೀಗೆ ಸುಮ್ಮನಿದ್ದು ದೇವರ ಜಪಮಾಡಿಕೊಂಡು ಇರುತ್ತೀರಿ? ನಿಮ್ಮಲ್ಲಿ ರಾಜಕೀಯ ಜಾಗೃತಿ ಮೂಡಬೇಕು. ಇತ್ತೀಚೆಗೆ ಹೆಣ್ಣುಮಕ್ಕಳ ಮೇಲೆ ಅತ್ಯಾಚಾರ ಪ್ರಕರಣಗಳು ಹೆಚ್ಚಾಗುತ್ತಿವೆ. ಎಳೆಯ ವಯಸ್ಸಿನ ಮಕ್ಕಳ ಮೇಲೂ ಲೈಂಗಿಕ ದೌರ್ಜನ್ಯಗಳು ನಡೆಯುತ್ತಿವೆ. ಅಂಥವರಿಗೆ ಗಲ್ಲು ಶಿಕ್ಷೆ ವಿಧಿಸಲು ಕೇಂದ್ರ ಸರಕಾರ ಮಂಡಿಸಿದ ಮಸೂದೆಗೆ ರಾಜ್ಯಸಭೆ ಒಪ್ಪಿಗೆ ನೀಡಿದೆ. ಇತ್ತೀಚೆಗೆ ರಾಷ್ಟ್ರಪತಿಗಳೂ ಅಂಕಿತ ಹಾಕಿದ್ದಾರೆ. ಈ ಯಾವ ಸುದ್ದಿಗಳೂ ಇಲ್ಲಿ ಸಿಗದಂತೆ ಈ ಧೂರ್ತರು ಮಾಡಿದ್ದಾರೆ. ಇನ್ನಾದರೂ ಎಚ್ಚೆತ್ತುಕೊಳ್ಳಿ. ನಿಮ್ಮನ್ನು ಇಲ್ಲಿ ಶೋಷಣೆ ಮಾಡುತ್ತಿರುವ ಇಂದ್ರ ಮತ್ತು ಯಮನ ವಿರುದ್ಧ ಸಂಘಟಿತರಾಗಿ ಹೋರಾಟ ಮಾಡಿ. ಆಮರಣಾಂತ ಉಪವಾಸ ಮಾಡಿಯಾದರೂ ಇವರ ದರ್ಪ ದೌರ್ಜನ್ಯಗಳ ವಿರುದ್ಧ ಹೋರಾಡೋಣ. ಸಾಕ್ಷಾತ್ ಶಿವನೇ ಬಂದು ಇವರನ್ನು ವಜಾ ಮಾಡುವವರೆಗೂ ನಮ್ಮ ನಿಮ್ಮ ಹೋರಾಟ ನಿಲ್ಲುವುದು ಬೇಡ. Down with Devendra! Down with Yamaraja! ರಾಜಕಾರಣಿಯ ಆ ಆವೇಶಭರಿತ ಮಾತುಗಳನ್ನು ಕೇಳಿ ಪ್ರಚೋದಿತರಾದ ಸ್ವರ್ಗ-ನರಕ ನಿವಾಸಿಗಳೆಲ್ಲರೂ ತಮ್ಮ ಕೈಗಳನ್ನು ಮೇಲೆತ್ತಿ ಮೂರು ಲೋಕಗಳೂ ಕೇಳುವಂತೆ ಒಕ್ಕೊರಲಿನಿಂದ ಕೂಗತೊಡಗಿದರು: "ಏನೇ ಬರಲಿ ಒಗ್ಗಟ್ಟಿರಲಿ! ಶಾಂತಿ, ಶಿಸ್ತು! ಧಿಕ್ಕಾರ ಧಿಕ್ಕಾರ ದೇವೇಂದ್ರನಿಗೆ ಧಿಕ್ಕಾರ! ಧಿಕ್ಕಾರ ಧಿಕ್ಕಾರ ಯಮರಾಜನಿಗೆ ಧಿಕ್ಕಾರ!”

ತಮ್ಮ ವಿದೇಶ ಪ್ರವಾಸವನ್ನು ಅರ್ಧಕ್ಕೇ ಮೊಟಕುಗೊಳಿಸಿ ಯಮ ಮತ್ತು ಇಂದ್ರ ಹಿಂದಿರುಗಿದರು. ಸ್ವರ್ಗ ಮತ್ತು ನರಕ ನಿವಾಸಿಗಳನ್ನು ಸಂಘಟಿಸಿ ಬಂಡಾಯದ ಕಹಳೆ ಮೊಳಗಿಸಿ ದಣಿದಿದ್ದ ರಾಜಕಾರಣಿ ತಡ ರಾತ್ರಿ ಮಲಗಲು ಸಜ್ಜಾಗುತ್ತಿದ್ದ. ಕಿಟಕಿಯಾಚೆ ಏನೋ ಸಪ್ಪಳವಾದಂತೆ ಕೇಳಿಸಿತು. ಪರದೆಯನ್ನು ನಿಧಾನವಾಗಿ ಸರಿಸಿ ನೋಡಿ ಆಶ್ಚರ್ಯಚಕಿತನಾದ. ಇಂದ್ರ ಮತ್ತು ಯಮ ಕಿಟಕಿಯ ಆಚೆ ಬದಿಯಲ್ಲಿ ನಿಂತಿದ್ದರು. ಅವರ ಮುಖಗಳು ಕಳವಳ ಮತ್ತು ಆತಂಕಗಳಿಂದಕೂಡಿದ್ದವು. "ನಿನ್ನೊಂದಿಗೆ ಖಾಸಗಿಯಾಗಿ ಮಾತನಾಡಬೇಕಾಗಿದೆ, ಒಳಗೆ ಬರಬಹುದೇ?" ಎಂದು ದೈನ್ಯದಿಂದ ಕೇಳಿಕೊಂಡರು. ರಾಜಕಾರಣಿ ಅವರನ್ನು ಗೌರವದಿಂದ ಒಳಗೆ ಬರಮಾಡಿಕೊಂಡ. “ನೀನು ಶಿವನವರೆಗೂ ಹೋಗುವುದು ಬೇಡ. ಈ ಬಂಡಾಯವನ್ನು ಇಲ್ಲಿಗೇ ನಿಲ್ಲಿಸಲು ನಿನಗೆ ಏನು ಬೇಕು? ಕೇಳು" ಎಂದರು. ರಾಜಕಾರಣಿ ಸ್ವಲ್ಪ ಹೊತ್ತು ಯೋಚನೆ ಮಾಡತೊಡಗಿದ. ಬಂಡಾಯ ನಿಲ್ಲಿಸಲು ಒಪ್ಪುತ್ತಾನೋ ಇಲ್ಲವೋ ಎಂದು ಇಂದ್ರ ಮತ್ತು ಯಮನ ಹೃದಯದ ಬಡಿತ ಏರತೊಡಗಿತು. ರಾಜಕಾರಣಿ ಗಂಭೀರ ವದನನಾಗಿ ತನ್ನ ಬೇಡಿಕೆಯನ್ನು ಅವರ ಮುಂದಿಟ್ಟ: "ಮುಂಬರುವ ಚುನಾವಣೆಯಲ್ಲಿ ಗೆಲ್ಲಲು ನನಗೆ ಬೇಕಾದಷ್ಟು ಹಣವನ್ನು ಚುನಾವಣಾ ಕಮಿಷನರ್ ಮತ್ತು ಐಟಿ ಅಧಿಕಾರಿಗಳ ಹದ್ದಿನ ಕಣ್ಣುಗಳಿಗೆ ಕಾಣಿಸದಂತೆ ಚುನಾವಣೆಯ ಹಿಂದಿನ ದಿನ ನೀವು ಕೊಡಲು ಸಿದ್ಧರಿದ್ದೀರಾ?” ಇಂದ್ರ ಮತ್ತ ಯಮ ತಡಮಾಡದೆ "ಆಗಲಿ" ಎಂದು ಒಪ್ಪಿಕೊಂಡರು. ಕುಬೇರನನ್ನು ಸಂಪರ್ಕಿಸಿ ಪರಿಸ್ಥಿತಿಯನ್ನು ಅವನಿಗೆ ವಿವರಿಸಿ ಬರಿಗೈಯಲ್ಲಿ ಕಳುಹಿಸಬಾರದೆಂದು ಅಡ್ವಾನ್ಸಾಗಿ ಹಣದ ಒಂದೆರಡು ಥೈಲಿಗಳನ್ನು ತರಿಸಿ ರಾಜಕಾರಣಿಯ ಕೈಗೆ ನೀಡಿದರು. ಪ್ರಸನ್ನವದನನಾದ ರಾಜಕಾರಣಿ ಇಂದ್ರ ಮತ್ತು ಕುಬೇರರಿಗೆ ವಿದಾಯ ಹೇಳಿ ರಾತ್ರೋರಾತ್ರಿ ತನ್ನ ಕ್ಷೇತ್ರಕ್ಕೆ ಧಾವಿಸಿದ.

ಸತ್ತಿರುವನೆಂದು ತಿಳಿದು ಸಮಾಧಿ ಮಾಡಲು ಮುಂದಾಗಿದ್ದ ಅವನ ಭೂಲೋಕದ ಬೆಂಬಲಿಗರು ತಮ್ಮ ನೇತಾರ ಕಣ್ತೆರೆದು ಎದ್ದು ಕುಳಿತಿದ್ದನ್ನು ನೋಡಿ ಹರ್ಷೋದ್ಗಾರ ವ್ಯಕ್ತಪಡಿಸಿದರು! ಬೇರೆಯ ಪಾಳಯಕ್ಕೆ ಜಿಗಿಯುವ ತಮ್ಮ ಗುಪ್ತ ಆಲೋಚನೆಯನ್ನು ಅಲ್ಲಿಗೇ ಕೈಬಿಟ್ಟು ಜಯಕಾರ ಹಾಕಿದರು!

-ಶ್ರೀ ತರಳಬಾಳು ಜಗದ್ಗುರು
ಡಾ|| ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು
ಸಿರಿಗೆರೆ.

ವಿಜಯ ಕರ್ನಾಟಕ 
ಬಿಸಿಲು ಬೆಳದಿಂಗಳು ದಿ: 26.4.2018