ಲೋಕಸಭಾ ಚುನಾವಣೆ ಈಗ ಎಲ್ಲರ ಮನೆಯ ಬಾಗಿಲಿಗೆ. ಬಂದುಬಿಟ್ಟಿದೆ. "ಬುಲೆಟ್" ಹೋರಾಟದ ಅನಂತರ ಈಗ "ಬ್ಯಾಲೆಟ್" ಹೋರಾಟ ಆರಂಭವಾಗಿದೆ. “ರಾಮ ರಾಜ್ಯ ಆಳಿದರೂ ರಾಗಿ ಬೀಸೋದು ತಪ್ಪೋದಿಲ್ಲ" ಎನ್ನುವ ಉದಾಸೀನ ಮತದಾನದ ವಿಷಯದಲ್ಲಿ ಉಂಟಾಗಿದೆ. ಚುನಾವಣೆಯಲ್ಲಿ ಮತದಾನ ಏಕೆ ಮಾಡಬೇಕು? ಅದರಿಂದ ಏನು ಪ್ರಯೋಜನ? ಎಂಬ ಪ್ರಶ್ನೆಗೆ ನಮ್ಮ ಮರು ಪ್ರಶ್ನೆ "ನೀವು ಊಟ ಏಕೆ ಮಾಡಬೇಕು? ಆದರಿಂದ ಏನು ಪ್ರಯೋಜನ?” ಎಂದು ಯಾರನ್ನಾದರೂ ಕೇಳುತ್ತೀರಾ? ಊಟ ಮಾಡದೆ ಇದ್ದರೆ ಏನಾಗುತ್ತದೆ? ಶರೀರ ಕೃಶವಾಗುತ್ತದೆ. ಹಸಿವು ನೀರಡಿಕೆಗಳಿಂದ ಬಳಲಿದ ದೇಹವು ಸಾವಿಗೆ ತುತ್ತಾಗುತ್ತದೆ. ಇದೇ ರೀತಿ ಮತದಾನ ಮಾಡದೆ ಇದ್ದರೆ ದೇಶ ಬಳಲುತ್ತದೆ. ದೇಶದ ಆಡಳಿತ ಕುಸಿಯುತ್ತದೆ. ಸದೃಢವಾದ ಸರಕಾರ ನೆಲೆಗೊಳ್ಳುವುದಿಲ್ಲ. ದೇಶದ ಆಡಳಿತಕ್ಕೆ ಧಕ್ಕೆ ಉಂಟಾದರೆ ಅದು ಈ ದೇಶದ ಪ್ರತಿಯೊಬ್ಬ ನಾಗರಿಕನ ಜೀವನಕ್ಕೂ ಧಕ್ಕೆ ತರುತ್ತದೆ.

ಹಸಿವಿನ ಬಾಧೆ ಉಂಟಾದಾಗ ಮನುಷ್ಯ ಹೇಗೆ ಅನ್ನಕ್ಕಾಗಿ ಹಾತೊರೆಯುತ್ತಾನೋ ಹಾಗೆ ಮತದಾನಕ್ಕಾಗಿ ಹಾತೊರೆಯುವ ನಾಗರಿಕ ಪ್ರಜ್ಞೆ ಎಲ್ಲರ ಮನಸ್ಸಿನಲ್ಲಿಯೂ ಮೂಡಬೇಕಾಗಿದೆ. ಮತದಾನ ಮಾಡದೆ ಇದ್ದರೆ ತಪ್ಪು ಮಾಡಿದೆ ಎಂಬ ಅಪರಾಧಿ ಪ್ರಜ್ಞೆ ಪ್ರತಿಯೊಬ್ಬ ವ್ಯಕ್ತಿಗೂ ಕಾಡುವಂತಾಗಬೇಕು. ಹಸಿವಾದಾಗ ಉಣ್ಣುವುದು ಬೇರೆ. ಹಸಿವಿಲ್ಲದಿದ್ದರೂ ಬಾಯಿ ಚಪಲಕ್ಕೆ ತಿನ್ನುವುದು ಬೇರೆ. ಹಸಿದಾಗ ಉಣ್ಣುವುದು ಶರೀರ ಧಾರಣೆಗೆ ಅತಿ ಮುಖ್ಯ ಮತ್ತು ಅನಿವಾರ್ಯ. ಬಾಯಿ ಚಪಲಕ್ಕೆ ತಿನ್ನುವುದು ಶರೀರಕ್ಕೆ ಅಗತ್ಯವೂ ಇಲ್ಲ; ಜೊತೆಗೆ ಆರೋಗ್ಯಕ್ಕೆ ಮಾರಕವೂ ಸಹ. ಶರೀರದ ಅಗತ್ಯವನ್ನು ಲಕ್ಷಿಸದೆ ಬಾಯಿ ಚಪಲಕ್ಕಾಗಿ ಯದ್ವಾ ತದ್ವಾ ತಿಂದರೆ ಅನಾರೋಗ್ಯ ಶತಸಿದ್ಧ! ಹಾಗೆಯೇ ಮತದಾರನು ಚುನಾವಣೆಯ ಸಂದರ್ಭದಲ್ಲಿ ಜವಾಬ್ದಾರಿಯಿಂದ  ಮತದಾನ ಮಾಡುವ ಬದಲು ನಾನಾ ಆಮಿಶಗಳಿಗೆ ಒಳಗಾಗಿ ಮತವಿಕ್ರಯ ಮಾಡಿಕೊಂಡರೆ ಬಾಯಿ ಚಪಲಕ್ಕಾಗಿ ತಿನ್ನ ಬಾರದ್ದನ್ನು ತಿಂದು ಆರೋಗ್ಯವನ್ನು ಕೆಡಿಸಿಕೊಂಡ ಹಾಗೆ! ಇದರಿಂದ ತನ್ನ ಶರೀರದ ಆರೋಗ್ಯವೂ ಹಾಳು; ದೇಶದ ಆರೋಗ್ಯವೂ ಹಾಳು! ಹಸಿವು ಪ್ರಾಕೃತಿಕ ಗುಣ. ಮತದಾನವೂ ಸಹ ಅಂತಹ ಸಹಜ ಗುಣ ಆಗಬೇಕು. ಮತದಾನ ಮಾಡದಿದ್ದರೆ ತಪ್ಪು ಮಾಡಿದೆನೆಂಬ ಅಪರಾಧಿ ಪ್ರಜ್ಞೆ ಜನರಲ್ಲಿ ಮೂಡಬೇಕು. ಮನುಷ್ಯ ಸ್ವಾರ್ಥಿಯಾಗಿರುವುದರಿಂದ ಇಂತಹ ಪ್ರಜ್ಞೆ ಮೂಡುವುದು ಕಷ್ಟ, ಮಗು ಹಾಲು ಕುಡಿಯದೆ ಹಟ ಮಾಡಿದರೆ ತಾಯಿ ಸುಮ್ಮನಿರುತ್ತಾಳೆಯೆ? ಮಗುವನ್ನು ತನ್ನ ತೊಡೆಯ ಮೇಲೆ ಕೂರಿಸಿಕೊಂಡು ಅದರ ಎರಡೂ ಕೈಗಳನ್ನು ಬಿಗಿಯಾಗಿ ಹಿಡಿದು ಒಳಲೆಯಲ್ಲಿ ಹಾಲು ತುಂಬಿ ಬಲವಂತವಾಗಿಯಾದರೂ ಕುಡಿಸುತ್ತಾಳೆ. ಹಾಗೆಯೇ ಸರಕಾರವು ಮತದಾನವನ್ನು ಕಡ್ಡಾಯಗೊಳಿಸಬೇಕು. ಮತದಾನ ಮಾಡದಿರುವುದು ಶಿಕ್ಷಾರ್ಹ ಅಪರಾಧವೆಂಬ ಕಾನೂನನ್ನು ತರಬೇಕು. ಮತದಾನ ಮಾಡದ ನಾಗರಿಕರಿಗೆ ಸರಕಾರದ ಸವಲತ್ತುಗಳನ್ನು ನಿಲ್ಲಿಸಬೇಕು. ನಾಗರಿಕ ಸೌಲಭ್ಯಗಳು ದೊರೆಯದಂತೆ ಮಾಡಬೇಕು. ಅಂತಹವರ ಪಡಿತರ ಚೀಟಿಗಳು, ಗರ್ಭಿಣಿ-ಹೆರಿಗೆ ಭತ್ಯೆಗಳು, ವಿಧವಾ ವೇತನ, ವೃದ್ಧಾಪ್ಯ ವೇತನ ಇತ್ಯಾದಿ ಎಲ್ಲವೂ ರದ್ದುಗೊಳ್ಳಬೇಕು. ಮತದಾನ ಮಾಡದ ಸರಕಾರಿ ನೌಕರರಿಗೆ ಖಾಯಂ ಆಗಿ ಬಡ್ತಿ ರದ್ದಾಗಬೇಕು. ಮತದಾನ ದೃಢೀಕರಣ ಪತ್ರ ನೀಡಿದವರಿಗೆ ಮಾತ್ರ ಮಂಜೂರು ಮಾಡಬೇಕು. ಯಾರು ಎಲ್ಲಿಗೇ ಹೋಗಲಿ ಅಲ್ಲಿಂದಲೇ ಅಂಚೆ ಮೂಲಕ ಮತದಾನ ಮಾಡಲು ಅವಕಾಶ ನೀಡಬೇಕು. ಅಂಚೆ ಮತಪತ್ರಗಳು ಸುಲಭವಾಗಿ ಸಿಗುವಂತೆ ಮಾಡಬೇಕು.

ನಮ್ಮ ದೇಶದ ಪ್ರಜ್ಞಾವಂತರೆನಿಸಿಕೊಂಡ ವಿದ್ಯಾವಂತರು ದೇಶದ ಬಗ್ಗೆ ಕಾಳಜಿಯ ಮಾತುಗಳನ್ನು ಯಥೇಚ್ಛವಾಗಿ ಆಡುತ್ತಾರೆ. ಅವಕಾಶ ಸಿಕ್ಕಾಗಲೆಲ್ಲಾ ದೇಶದ ಸಮಸ್ಯೆಗಳನ್ನು ಕುರಿತು ಚರ್ಚೆ ನಡೆಸುತ್ತಾರೆ. ಆದರೆ ಮತದಾನದ ದಿನ ಮತಗಟ್ಟೆಗೆ ಹೋಗಿ ತಮ್ಮ ಪರಮಾಧಿಕಾರವಾದ ಮತ ಚಲಾಯಿಸುವುದನ್ನು ನಿರ್ಲಕ್ಷಿಸುತ್ತಾರೆ. ದೇಶದ ಹಣೆಬರೆಹವನ್ನು ನಿರ್ಧರಿಸುವ ಈ ಮತದಾನ ಕುರಿತ ಅವರ ದಿವ್ಯ ನಿರ್ಲಕ್ಷ್ಯಕ್ಕೆ ಏನು ಹೇಳಬೇಕೋ ತಿಳಿಯದು! ಮತದಾನ ಮಾಡದೆ ಮನೆಯಲ್ಲಿಯೇ ಉಳಿದು, ಆರಿಸಿ ಬಂದ ಪ್ರತಿನಿಧಿಯ ಬಗ್ಗೆ ಮುಂದೆ ಐದು ವರ್ಷಗಳು ಇವರೇ ಟೀಕೆಟಿಪ್ಪಣಿ ಮಾಡುತ್ತಾರೆ. ನಾವಂತೂ ಚುನಾವಣೆಗಳಲ್ಲಿ ತಪ್ಪದೆ ಮತದಾನ ಮಾಡುತ್ತಾ ಬಂದಿದ್ದೇವೆ. ಇದು ನಮ್ಮ  ಗುರುವರ್ಯರಿಂದ ಕಲಿತ ಪಾಠ, ಅವರು ತಪ್ಪದೆ ಮತದಾನ ಮಾಡುತ್ತಿದ್ದರು. ಮತದಾನವು ಪೂಜೆಯಷ್ಟೇ ಪವಿತ್ರವಾದುದು ಎಂದು ಅವರು ಹೇಳುತ್ತಿದ್ದರು. ಅಂದಿನ ರಾಜಕೀಯ ಶಕ್ತಿಯ ಕೇಂದ್ರ ಬಿಂದುವೂ ಅವರಾಗಿದ್ದರು. "ಸಿರಿಗೆರೆ ಸ್ವಾಮಿಗಳು ಸೀನಿದರೆ ವಿಧಾನ ಸೌಧ ನಡುಗುತ್ತದೆ" ಎಂಬ ಗಾದೆ ಮಾತು ಅವರ ಕಾಲದಲ್ಲಿ ಪ್ರಚಲಿತದಲ್ಲಿತ್ತು.

ಈ ಬಾರಿ ಕರ್ನಾಟಕದಲ್ಲಿ ಏಪ್ರಿಲ್ 18 ರಂದು ಮೊದಲ ಸುತ್ತಿನ ಮತದಾನವಿದೆ. ಅದರ ಹಿಂದಿನ ದಿನ ಅಂದರೆ ಏಪ್ರಿಲ್ 17 ರಂದು ಮಹಾವೀರ ಜಯಂತಿ ಇರುವ ಪ್ರಯುಕ್ತ ಸಾರ್ವಜನಿಕ ರಜೆ. 18 ರಂದು ಮತದಾನದ ಕಾರಣ ಸಾರ್ವಜನಿಕ ರಜೆ. 19ರಂದು Good Friday ರಜೆ. 20ರ ಶನಿವಾರ ರಜೆ. 21ರ ಭಾನುವಾರವಂತೂ ರಜೆಯೇ ರಜೆ! ಹೀಗೆ ಸಾಲು ಸಾಲಾಗಿ ಐದು ದಿನಗಳ ರಜೆ ದೊರೆಯುವುದರಿಂದ ನೌಕರರು ಅದರ "ಸದುಪಯೋಗ" ಪಡಿಸಿಕೊಳ್ಳದೆ  ಬಿಟ್ಟಾರೆಯೇ!  A very good week for a family tour!  ನಿಮಗೆ ಐದು ದಿನಗಳ ಪ್ರವಾಸ ಮುಖ್ಯವೋ ಮತದಾನ ಮುಖ್ಯವೋ? ಎಂದು ಕೇಳಿದರೆ ಮತದಾನವೇ ಮುಖ್ಯ ಎಂಬ ಉತ್ತರ ತಾತ್ವಿಕವಾಗಿ ಕೇಳಿಬಂದರೂ ಅದನ್ನು ಪಾಲಿಸುವ ಮಂದಿ ಎಷ್ಟು ಜನ! ಅಪರೂಪಕ್ಕೆ ಕುಟುಂಬದ ಸದಸ್ಯರೆಲ್ಲರೂ ಒಟ್ಟಿಗೆ ಟೂರ್ ಮಾಡಲು ಸಿಕ್ಕ ಈ ಅವಕಾಶವನ್ನು ಕಳೆದುಕೊಳ್ಳುವುದಾದರೂ ಹೇಗೆ? ಎಂಬ ತಾರ್ಕಿಕ ಆಲೋಚನೆ. ಪಕ್ಕದ ಮನೆಯವರು ತಿರುಪತಿಗೆ ಹೊರಟಿರುವಾಗ ನಾವು ಬಿಡೋದು ಹೇಗೆ ಸಾರ್! ಇಂಥವರ ವ್ಯಾವಹಾರಿಕ ಭಕ್ತಿಯು ತಿರುಪತಿ ತಿಮ್ಮಪ್ಪನನ್ನು ರಜೆ-ಗಿಜೆ ಎನ್ನದೆ ಶತಮಾನಗಳಿಂದ ಕಾಡಿನಲ್ಲಿ ಏಳು ಬೆಟ್ಟಗಳ ಮೇಲೆ ಒಂಟಿಗಾಲಿನಲ್ಲಿಯೇ ನಿಲ್ಲಿಸಿದೆ! 

ಮಗನಿಗೆ ಮದುವೆ ಮಾಡಿ ಸೊಸೆಯನ್ನು ಮನೆದುಂಬಿಸಿಕೊಳ್ಳುವ ಪೂರ್ವದಲ್ಲಿ ಗಂಡಿನ ತಂದೆ ತಾಯಿಗಳು ಎಷ್ಟೆಲ್ಲಾ ನಕ್ಷತ್ರ, ರಾಶಿ, ಕುಂಡಲಿ ನೋಡಿ ಅಳೆದು ತೂಗಿ ತೀರ್ಮಾನಕ್ಕೆ ಬರುತ್ತಾರೆ! ಸೊಸೆ ರೂಪವತಿಯಾಗಿರಬೇಕು, ಗುಣವತಿಯೂ ಆಗಿರಬೇಕು, ತಮ್ಮ ಸಂಸಾರದ ಜೊತೆ ಹೊಂದಿಕೊಂಡು ಹೋಗುವಳಾಗಬೇಕು ಎಂದೆಲ್ಲಾ ಸಾವಿರ ಸಲ ಸಾವಿರ ರೀತಿಯಲ್ಲಿ ಯೋಚನೆ ಮಾಡಿ ಮುಂದುವರಿಯುತ್ತಾರೆ. ಹೆಚ್ಚು ವರದಕ್ಷಿಣೆ ಸಿಗುತ್ತದೆ ಎಂದ ಮಾತ್ರಕ್ಕೆ ಯಾರೂ ಕಾಲಿಲ್ಲದವಳನ್ನು/ಕಣ್ಣಿಲ್ಲದವಳನ್ನು ಸೊಸೆಯಾಗಿ ಸ್ವೀಕರಿಸಲು ಸುತರಾಂ ಒಪ್ಪುವುದಿಲ್ಲ. ತಮ್ಮ ಕೌಟುಂಬಿಕ ನೆಲೆಯಲ್ಲಿ ಇಷ್ಟೆಲ್ಲಾ ಜಾಗರೂಕತೆ ವಹಿಸುವ ನಮ್ಮ ಈ ಜನ ದೇಶದ ಹಣೆಬರಹವನ್ನು ನಿರ್ಧರಿಸುವ ಚುನಾವಣೆಯಲ್ಲಿ ಏಕೆ ನಿಷ್ಕಾಳಜಿಯಿಂದ ವರ್ತಿಸುತ್ತಾರೆ? ಹಣದ ಕಾರಣಕ್ಕೋ ಜಾತಿಯ ಕಾರಣಕ್ಕೋ ಎಂತೆಂಥಹ ಅಯೋಗ್ಯರನ್ನು ಆರಿಸಿ ತಮ್ಮ ಕಾಲ ಮೇಲೆ ತಾವೇ ಕಲ್ಲುಚಪ್ಪಡಿ ಎಳೆದುಕೊಳ್ಳುತ್ತಾರೆ! ದೇಶವೂ ಒಂದು ದೊಡ್ಡ ಅವಿಭಕ್ತ ಕುಟುಂಬ ಇದ್ದ ಹಾಗೆ. ಜನರೇನೂ ದಡ್ಡರಲ್ಲ. ಆದರೆ ಕೌಟುಂಬಿಕ ಸ್ತರದಲ್ಲಿ ಹೇಗೆ ಯೋಚನೆ ಮಾಡಿ ಜಾಗೃತಿ ವಹಿಸುತ್ತಾರೋ ಹಾಗೆ ದೇಶದ ಸ್ತರದಲ್ಲಿ ಜಾಗೃವಹಿಸುತ್ತಿಲ್ಲ. ಇದೇ ಇಂದಿನ ರಾಷ್ಟ್ರೀಯ ದುರಂತ.

ಇಂದಿನ ರಾಜಕೀಯ ಕುದುರೆಯ ಜೂಜಾಗಿದೆ. ಹಣದ ಬಲ ಮತ್ತು ಜಾತಿಯ ಬಲ ಇಲ್ಲದವರು ಚುನಾವಣೆಯಲ್ಲಿ ನಿಂತು ಗೆಲ್ಲಲು ಸಾಧ್ಯವಿಲ್ಲ ಎಂಬ ವಾತಾವರಣ ಸೃಷ್ಟಿಯಾಗಿದೆ. ಇದಕ್ಕೆ ಕಾರಣರು ಯಾರು? ನಮ್ಮ ಜನರೋ ಅಥವಾ ರಾಜಕಾರಣಿಗಳೋ? ಜನರು ರಾಜಕಾರಣಿಗಳನ್ನು ಭ್ರಷ್ಟರನ್ನಾಗಿಸಿದ್ದಾರೋ, ರಾಜಕಾರಣಿಗಳು ಜನರನ್ನು ಭ್ರಷ್ಟರನ್ನಾಗಿಸಿದ್ದಾರೋ? ಬೀಜವೃಕ್ಷ ನ್ಯಾಯದಂತೆ ಬೀಜದಿಂದ ಮರವೋ, ಮರದಿಂದ ಬೀಜವೋ ಎಂಬಂತಹ ಸ್ಥಿತಿಯುಂಟಾಗಿದೆ. ರಾಜಕೀಯ ಪಕ್ಷಗಳಿಗೋ ಗೆಲ್ಲುವುದೇ ಮುಖ್ಯ. ಅವುಗಳಿಗೆ ಉತ್ತಮರು ಸಜ್ಜನರು ಬೇಡವೆಂದಲ್ಲ. ಆದರೆ ಅಂತಹವರಿಗೆ ಟಿಕೇಟು ನೀಡಿದರೆ ಗೆಲ್ಲುವುದಿಲ್ಲ ಎಂದು ಅನ್ಯ ವಿಕಲ್ಪವಿಲ್ಲದೆ ಜಾತಿ ಬಲ ಮತ್ತು ಹಣ ಬಲವಿದ್ದವರಿಗೆ ಮಾತ್ರ ಮಣೆ ಹಾಕುತ್ತವೆ. ಮೇಲುನೋಟಕ್ಕೆ ಭ್ರಷ್ಟಾಚಾರಕ್ಕೆ ಕಾರಣರಾಜಕಾರಣಿಗಳೆಂದು ಅನ್ನಿಸುತ್ತದೆ. ಆದರೆ ಭ್ರಷ್ಟಾಚಾರದ ತಾಯಿ ಬೇರು. ಇರುವುದೇ ನಮ್ಮ ದೇಶದ ಮತದಾರರಲ್ಲಿ.

ಹಣ ಬಲವಿಲ್ಲದ ಜಾತಿ ಬಲವಿಲ್ಲದ ಪರಿಶುದ್ಧನಾದ ವ್ಯಕ್ತಿ ಚುನಾವಣೆಗೆ ನಿಂತು ಗೆದ್ದು ಬರುವ ವಾತಾವರಣ ಸಮಾಜದಲ್ಲಿ ನೆಲೆಗೊಳ್ಳಬೇಕಾದ ಅಗತ್ಯವಿದೆ. ಆಗ ಎಲ್ಲ ರಾಜಕೀಯ ಪಕ್ಷಗಳು, ಅಂತಹ ವ್ಯಕ್ತಿಗಳನ್ನೇ ಹುಡುಕಿ ಹುಡುಕಿ ಟಿಕೆಟ್ ನೀಡುತ್ತವೆ. ಇದು ಯಾವಾಗ ಸಾಧ್ಯವಾಗುತ್ತದೆ ಎಂದರೆ ಜನರು ಪರಿಶುದ್ಧರಾದಾಗ, ಹಿಟ್ಟು ಇದ್ದಂತೆ ರೊಟ್ಟಿ  ಎಂಬ ಗಾದೆ ಇದೆ. ರಾಗಿ ಹಿಟ್ಟಿನಿಂದ ಚಪಾತಿ ಮಾಡಲು ಹೇಗೆ ಸಾಧ್ಯವಿಲ್ಲವೋ ಹಾಗೆ ಭ್ರಷ್ಟ ಮತದಾರರು ಆರಿಸುವ ವ್ಯಕ್ತಿ ಪರಿಶುದ್ಧನಾಗಿರಲು ಸಾಧ್ಯವಿಲ್ಲ. ಚುನಾವಣೆಯಲ್ಲಿ ಖರ್ಚು ಮಾಡಿದ ಹಣವನ್ನು ತನ್ನ ಅಧಿಕಾರದ ಕಾಲಾವಧಿಯಲ್ಲಿ ದುಡಿದುಕೊಳ್ಳಬೇಕಾದ ಅನಿವಾರ್ಯತೆ ಅವನಿಗಿರುತ್ತದೆ. ಅಲ್ಲದೆ ಮುಂದಿನ ದುಬಾರಿ ಚುನಾವಣೆಯ ವೆಚ್ಚಕ್ಕೂ ಆತ ಕೂಡಿಡಬೇಕು. ಒಟ್ಟಾರೆ ಇದೊಂದು ವಿಷವರ್ತುಲ. ಇದರಲ್ಲಿ ಸಿಲುಕಿದ ದೇಶ ನರಳುವಂತಾಗಿದೆ. ಎಲ್ಲಿಯವರೆಗೆ ಜನರು ಒಳ್ಳೆಯವರಾಗುವುದಿಲ್ಲವೋ ಅಲ್ಲಿಯವರೆಗೂ ಒಳ್ಳೆಯ ನಾಯಕತ್ವ ಎಂಬುದು ಕನಸಿನ ಮಾತೇ ಸರಿ.

ಪಾಕಿಸ್ತಾನದ ಒಳಗೆ ಅಡಗಿದ ಉಗ್ರರ ನೆಲೆಗಳ ಮೇಲೆ ಭಾರತೀಯ ವಾಯುಪಡೆಯ ಸರ್ಜಿಕಲ್ ಧಾಳಿ ನಡೆದ ಅನಂತರ ಪ್ರತೀಕಾರವಾಗಿ ಮರುಧಾಳಿ ನಡೆಸಲು ಯತ್ನಿಸಿದ ಪಾಕ್ ವಿಮಾನವನ್ನು ಹೊಡೆದುರುಳಿಸಿದ. ಹಿನ್ನೆಲೆಯಲ್ಲಿ ವಾಯುಪಡೆಯ ವಿಂಗ್ ಕಮ್ಯಾಂಡರ್ ಅಭಿನಂದನ ಪಾಕಿಸ್ತಾನದ ಕೈಸೆರೆಯಾದರು. ಅವರು ಬಿಡುಗಡೆಗೊಂಡು ವಾಪಾಸು ಬರುತ್ತಾರೋ ಇಲ್ಲವೋ ಎಂಬ ದುಗುಡ ಮತ್ತು ಕಾತರ ಕೇವಲ ಅವರ ತಂದೆ-ತಾಯಿಗಳಿಗಷ್ಟೇ ಅಲ್ಲ ಅವರ ಬರುವಿಕೆಗಾಗಿ ತುದಿಗಾಲ ಮೇಲೆ ನಿಂತು ಜಾತಕ ಪಕ್ಷಿಯಂತೆ ಕಾದವರು ಇಡೀ ದೇಶದ ಜನತೆ ಅವರ ಸ್ವದೇಶಾಗಮನದ ನಿರೀಕ್ಷೆಯ ದುಗುಡ, ದುಮ್ಮಾನ ಇಡೀ ದೇಶದ ಜನತೆಯಲ್ಲಿ ಮಡುಗಟ್ಟಿತ್ತು. ದೇಶಾಭಿಮಾನ ದೇಶಾದ್ಯಂತ ಪುಟಿದೆದ್ದಿತ್ತು. ಆ ಸಂದರ್ಭದಲ್ಲಿ ಪಕ್ಷಭೇದ ಮರೆತು ಎಲ್ಲ ರಾಜಕೀಯ ಧುರೀಣರೂ ದನಿಗೂಡಿಸಿದ್ದು ಪ್ರಶಂಸನೀಯ. ಮತದಾನದ ಈ ಸಂದರ್ಭದಲ್ಲೂ ಅಂತಹದೇ ದೇಶಾಭಿಮಾನ ಜಾಗೃತಗೊಳ್ಳಬೇಕು.

ದೇಶದ ಹಿತದ ಮುಂದೆ ಉಳಿದೆಲ್ಲ ವಿಷಯಗಳು ನಗಣ್ಯವಾಗಬೇಕು. ಭಾರತೀಯ ಯೋಧರ ತ್ಯಾಗ ಮತ್ತು ಬಲಿದಾನಗಳನ್ನು ಆಡಳಿತ ಪಕ್ಷದವರೇ ಆಗಲೀ, ಪ್ರತಿ ಪಕ್ಷದವರೇ ಆಗಲೀ ಯಾರೂ ತಮ್ಮ ರಾಜಕೀಯ ಹಿತಾಸಕ್ತಿಗಳಿಗೆ ಮುಂಬರುವ ಚುನಾವಣೆಯಲ್ಲಿ ದುರ್ಬಳಕೆ ಮಾಡಿಕೊಳ್ಳಬಾರದು. ಚುನಾವಣಾ ಪ್ರಚಾರದಲ್ಲಿ ಅದರ ಸೊಲ್ಲೇ ಇರಬಾರದು. ನೀವು ಗೆದ್ದು ಬಂದರೆ ದೇಶಕ್ಕಾಗಿ ಏನು ಮಾಡುತ್ತೀರೆಂದು ಅಷ್ಟೇ ಹೇಳಿ. ಇಲ್ಲದಿದ್ದರೆ ಜೀವದ ಹಂಗು ತೊರೆದು ಹೋರಾಡಿ ಹುತಾತ್ಮರಾದ ಆ ವೀರ ಯೋಧರಿಗೆ ಅವಮಾನ ಮಾಡಿದಂತಾಗುತ್ತದೆ ಎಂಬ ಒಳ ಎಚ್ಚರ ನಮ್ಮ ನಾಡಿನ ಎಲ್ಲ ರಾಜಕೀಯ ಧುರೀಣರು ಮತ್ತು ಮತದಾರರ ಹೃದಯದಲ್ಲಿ ನೆಲೆಗೊಂಡಿರಲಿ!

-ಶ್ರೀ ತರಳಬಾಳು ಜಗದ್ಗುರು
ಡಾ|| ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು
ಸಿರಿಗೆರೆ.

ವಿಜಯ ಕರ್ನಾಟಕ 
ಬಿಸಿಲು ಬೆಳದಿಂಗಳು ದಿ: 14.3.2019