ಜನವರಿ 21, ಸೋಮವಾರ ಮಧ್ಯಾಹ್ನ. ಅಂದು ಸಿರಿಗೆರೆಯಲ್ಲಿ ನಮ್ಮ ಸದ್ಧರ್ಮ ನ್ಯಾಯಪೀಠದ ಕಾರ್ಯಕಲಾಪಗಳು ನಡೆಯುತ್ತಿದ್ದವು. ಯಾವುದೋ ಪ್ರಕರಣದ ವಿಚಾರಣೆಯ ಮಧ್ಯೆ ನಮ್ಮ ಮೊಬೈಲ್ ರಿಂಗಣಿಸಿತು. ಕರೆಯನ್ನು ಸ್ವೀಕರಿಸಿದಾಗ ಆಚೆ ಕಡೆಯಿಂದ ಮಾತನಾಡಿದವರು ದಾರುಣವಾದ ಸುದ್ದಿಯನ್ನು ನೀಡಿದರು. ನಡೆದಾಡುವ ದೇವರೆಂದೇ ಖ್ಯಾತರಾದ ಸಿದ್ಧಗಂಗಾ ಶ್ರೀಗಳು ಶಿವಸಾಯುಜ್ಯ ಹೊಂದಿದರು. ಎಂಬುದೇ ಆ ಸುದ್ದಿ. ಅದನ್ನು ನಂಬುವುದು ನಮಗೆ ಬಹಳ ಕಷ್ಟವಾಯಿತು. ಕೆಲವು ದಿನಗಳ ಹಿಂದಷ್ಟೇ ತುಮಕೂರಿನ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಅವರನ್ನು ಭೇಟಿ ಮಾಡಲು ಹೋದಾಗ ಗಾಢ ನಿದ್ರೆಯಲ್ಲಿದ್ದರು. ಸ್ವತಃ ದೀರ್ಘವಾಗಿ ಉಸಿರಾಡುತ್ತಿದ್ದರು. ಚಿಕಿತ್ಸೆ ನೀಡುತ್ತಿದ್ದ ವೈದ್ಯರು ಅವರ ಹೃದಯದ ನಾಡಿ ಮಿಡಿತ, ಉಸಿರಾಟ ಎಲ್ಲವೂ normal ಆಗಿಯೇ ಇದೆ ಎಂದು ಹೇಳಿದ್ದರು. ಕಿರಿಯ ಶ್ರೀಗಳಾದ ಶ್ರೀ ಸಿದ್ಧಲಿಂಗ ಸ್ವಾಮಿಗಳವರು ಅವರ ಎಡ ಭುಜವನ್ನು ಅಲ್ಲಾಡಿಸಿ ಸಿರಿಗೆರೆ ಗುರುಗಳು ತಮ್ಮನ್ನು ನೋಡಲು ಬಂದಿದ್ದಾರೆ ಎಂದು ಏರು ದನಿಯಲ್ಲಿ ಹೇಳಿ ಅವರನ್ನು ಎಚ್ಚರಿಸಲು ಯತ್ನಿಸಿದರು. ಅವರಿಗೆ ನಿದ್ರಾಭಂಗವಾಗಬಾರದೆಂದು ತಕ್ಷಣವೇ ತಡೆದು ನಿಲ್ಲಿಸಿ ಅವರ ಮುಖವನ್ನೇ ದಿಟ್ಟಿಸಿ ನೋಡುತ್ತಾ ನಿಂತಾಗ ಅವರ ಮುಖದಲ್ಲಿ ಲೌಕಿಕ ಜೀವನದ ಯಾವ ಹಂಗೂ ಇಲ್ಲದ "ಸ್ಥಿತಪ್ರಜ್ಞ" ಮುಖಭಾವ ಕಣ್ಣಿಗೆ ಗೋಚರಿಸುತ್ತಿತ್ತು.

ಈ ಹಿಂದೆ ಎಷ್ಟೋ ಸಲ ಜವರಾಯ ಶ್ರೀಗಳವರೊಂದಿಗೆ ಕಣ್ಣಾಮುಚ್ಚಾಲೆ ಆಡಿದ್ದ. ಅತಿ ಸಮೀಪಕ್ಕೆ ಬಂದಾಗಲೂ ಅವರನ್ನು ಮುಟ್ಟುವ ಧೈರ್ಯ ಅವನಿಗೆ ಇರಲಿಲ್ಲ. ಪವಾಡವೆಂಬಂತೆ ಅವನನ್ನು ಹಿಮ್ಮೆಟ್ಟಿಸಿ ಚೇತರಿಸಿಕೊಂಡು ಬದುಕಿ ಉಳಿದಿದ್ದರು. ಈ ಸಲವೂಹಾಗೇ ಆಗುತ್ತದೆಂಬ ನಮ್ಮ ನಿರೀಕ್ಷೆ ಹುಸಿಯಾಗಿತ್ತು. ಹಿರಿಯ ತಲೆಮಾರಿನ ಕೊನೆಯ ಕೊಂಡಿ ಕೊನೆಗೂ ಕಳಚಿ ಬಿದ್ದಿತ್ತು! ನ್ಯಾಯಪೀಠದ ಕಲಾಪವನ್ನು ಮುಂದೂಡಿ ಅವಸರ ಅವಸರವಾಗಿ ಸಿದ್ಧಗಂಗೆಯತ್ತ ಧಾವಿಸಿದೆವು.

ಹಿಂದೊಮ್ಮೆ ಬೆಂಗಳೂರಿನ ಬಿ.ಜಿ.ಎಸ್. ಆಸ್ಪತ್ರೆಗೆ ದಾಖಲಾಗಿದ್ದ ಶ್ರೀಗಳವರನ್ನು ಭೇಟಿ ಮಾಡಲು ಹೋಗಿದ್ದಾಗ ನುರಿತ ವೈದ್ಯಕೀಯ ತಂಡದವರೇ ವಿಸ್ಮಯಗೊಳ್ಳುವಂತೆ ಚೇತರಿಸಿಕೊಂಡಿದ್ದರು. ನಮ್ಮನ್ನು ಕಂಡಾಕ್ಷಣ ಉಭಯ ಕುಶಲೋಪರಿ ಮಾತುಗಳ ಅನಂತರ ವೈದ್ಯರತ್ತ ತಿರುಗಿ "Very hard-working Swamiji" ಎಂದು ನಮ್ಮನ್ನು ಪರಿಚಯಿಸಿದರು. ಶ್ರೀಗಳವರಿಗೆ ಹಳ್ಳಿಯ ರೈತರೆಂದರೆ ಬಹಳ ಪ್ರೀತಿ. ಅವರ ಕಷ್ಟಗಳಿಗೆ ಮಮ್ಮಲ ಮರುಗುವ ಹೃದಯ ಅವರದು. ಯಾರೇ ದರ್ಶನಕ್ಕೆ ಬಂದರೂ ಅವರು ಕೇಳುತ್ತಿದ್ದ ಮೊಟ್ಟಮೊದಲ ಪ್ರಶ್ನೆ: “ನಿಮ್ಮ ಕಡೆ ಮಳೆ, ಬೆಳೆ ಹೇಗೆ?” ಅವರ-ನಮ್ಮ ಭೇಟಿಯಾದಾಗಲೆಲ್ಲಾ ನಮಗೂ ಇದೇ ಪ್ರಶ್ನೆ. ಅವರಿಗೆ ಭಕ್ತರ ಚಿಂತೆ ಬಿಟ್ಟರೆ ತಮ್ಮ ಆರೋಗ್ಯದ ಬಗ್ಗೆ ಚಿಂತೆ ಇರಲಿಲ್ಲ. ಅಂದು ಆಸ್ಪತ್ರೆಯಿಂದ ಬಿಡುಗಡೆಗೊಂಡು ಸಿದ್ಧಗಂಗೆಗೆ ಪ್ರಯಾಣ ಬೆಳೆಸುವುದರಲ್ಲಿದ್ದರು. ಚಿಕಿತ್ಸೆ ನೀಡಿದ ನುರಿತ ವೈದ್ಯರುಗಳಿಗೆ ಮತ್ತು ಆಸ್ಪತ್ರೆ ಸಿಬ್ಬಂದಿಯವರಿಗೆ ಕಿರಿಯ ಶ್ರೀಗಳು ನಮ್ಮ ಕೈಯಿಂದಲೇ ನೆನಪಿನ ಕಾಣಿಕೆಗಳನ್ನು ಕೊಡಿಸಿದರು. ಅದೊಂದು ಕೃತಜ್ಞತೆಯನ್ನು ಸೂಚಿಸುವ ಅನೌಪಚಾರಿಕ ಸಭೆಯಾಗಿತ್ತು!

ಶ್ರೀಗಳವರೊಂದಿಗೆ ಪಾಲ್ಗೊಂಡ ಅನೇಕ ಸಭೆ-ಸಮಾರಂಭಗಳು ನಮ್ಮ ಕಣ್ಮುಂದೇ ಈಗಲೂ ಹಚ್ಚಹಸಿರಾಗಿವೆ. ವೇದಿಕೆಯನ್ನು ಮೇಲೇರುತ್ತಿದ್ದಂತೆಯೇ ನಮ್ಮ ಗುರುಗಳ ಸಮಾನರಾಗಿದ್ದ ಅವರು ವಯಸ್ಸಿನಲ್ಲಿ ಹಿರಿಯರಾಗಿದ್ದರೂ ಎದ್ದು ನಿಂತು ಕೊಡುತ್ತಿದ್ದ ಗೌರವ ನಮಗೆ ಮುಜುಗರವನ್ನುಂಟುಮಾಡುತ್ತಿತ್ತು. ಶ್ರೀಗಳವರು ಸಭೆ ಸಮಾರಂಭಗಳಲ್ಲಿ ನೀಡುತ್ತಿದ್ದ ಆಶೀರ್ವಚನ ಜನರನ್ನು ನೋಡುತ್ತಾ ಅಲ್ಲ; ತಲೆ ಬಾಗಿಸಿ ತಮ್ಮ ಆತ್ಮದ ಜೊತೆ ಸಂಭಾಷಣೆ ಮಾಡಿದ ರೀತಿಯಲ್ಲಿರುತ್ತಿತ್ತು. ಕೆಲವು ವರ್ಷಗಳ ಹಿಂದೆ ಸುತ್ತೂರು ಮಠದಲ್ಲಿ ಒಂದು ಕಾರ್ಯಕ್ರಮವಿತ್ತು. ಮಠದ ಗದ್ದುಗೆಯ ಮೇಲೆ ತುಂಬಾ ಎತ್ತರದಲ್ಲಿದ್ದ ಗೋಪುರದ ಕಲಶಾರೋಹಣ. ಯುವಸ್ವಾಮಿಗಳೂನಾಚುವಂತೆ ಪಾದರಸದಷ್ಟು ಚುರುಕಾಗಿ ಶಿಖರವನ್ನೇರಿ ಕಲಶಾರೋಹಣ ನೆರವೇರಿಸಿದರು.

ಈಗ್ಗೆ ಎರಡು ತಿಂಗಳ ಹಿಂದೆ ಸಿದ್ಧಗಂಗಾ ಮಠದ ಶಿಷ್ಯ ನಮ್ಮನ್ನು ಕಂಡು ಗುರುಗಳವರ 112ನೆಯ ಜನ್ಮದಿನಾಚರಣೆಯಲ್ಲಿ ಭಾಗವಹಿಸಲು ಒಪ್ಪಿಸಿಕೊಂಡಿದ್ದರು. (ಎಪ್ರಿಲ್ 1ಕ್ಕೆ ಅವರಿಗೆ 112 ವರ್ಷ ತುಂಬುತ್ತಿತ್ತು). ಕ್ರಿಕೆಟ್ ಆಟದ ಮೈದಾನದಲ್ಲಿ ನೂರು ರನ್ ಬಾರಿಸಿ ಶತಕವೀರನೆನಿಸಿಕೊಂಡವರು ಅನೇಕರಿದ್ದಾರೆ. ಆದರೆ ಬದುಕಿನ ಕ್ರಿಕೆಟ್ನಲ್ಲಿ ಶತಕ ಬಾರಿಸುವವರು ಅಪರೂಪ. ಶ್ರೀಗಳವರದು ಶತಮಾನ ದಾಟಿ ಬದುಕಿದ ಜಗತ್ತಿನ ದೀರ್ಘಾಯುಷಿಗಳಲ್ಲಿ ಆರನೆಯ ಶ್ರೇಯಾಂಕ; ಭಾರತದಲ್ಲಿ ಅವರದು ಮೊದಲನೆಯ ಸ್ಥಾನ!

ಇದೇ ಜನವರಿ ತಿಂಗಳು ಉತ್ತರ ಭಾರತದ ಪ್ರಯಾಗದಲ್ಲಿ ಮಕರ ಸಂಕ್ರಮಣದ ದಿನ ಕುಂಭಮೇಳ, ಅಂದು ಗಂಗೆಯಲ್ಲಿ ಮೀಯಲು ದೇಶಾದ್ಯಂತ ಆಗಮಿಸಿದ ಲಕ್ಷಾಂತರ ಜನರ ಮಹಾಸಾಗರ. ಈ ವರ್ಷ ಎರಡು ಕುಂಭಮೇಳಗಳು ನಡೆದಂತಾಗಿವೆ- ಒಂದು ಉತ್ತರ ಭಾರತದ ಪ್ರಯಾಗದಲ್ಲಿ ಶತ ಶತಮಾನಗಳಿಂದಲೂ ನಡೆದುಕೊಂಡು ಬಂದಿರುವ ಕುಂಭಮೇಳ ಮತ್ತೊಂದು ದಕ್ಷಿಣ ಭಾರತದ ಸಿದ್ಧಗಂಗೆಯಲ್ಲಿ ಜನವರಿ 21 ಮತ್ತು 22 ರಂದು ನಡೆದ ಭಕ್ತಿ ಸಂಕ್ರಮಣದ ಕುಂಭಮೇಳ. ಮಕರ ಸಂಕ್ರಮಣದ ಕೆಲವೇ ದಿನಗಳ ನಂತರ ನಡೆದ ಈ ಎರಡನೆಯ 'ಕುಂಭಮೇಳ'ದ ಭಕ್ತಿಯ ರಸಗಂಗೆಯಲ್ಲಿ ಮೀಯಲು ಲಕ್ಷೋಪಲಕ್ಷ ಜನರ ಸಾಗರ. ಶ್ರೀಗಳವರ ಅಂತಿಮ ದರ್ಶನಕ್ಕೆ ಹರಿದು ಬಂದಿತ್ತು ಹತ್ತಾರು ಕಿಲೋಮೀಟರುಗಳ ಸರತಿಯ ಸಾಲಿನಲ್ಲಿ. ದಿವಂಗತ ಪ್ರಧಾನಿ ವಾಜಪೇಯಿ ಸರಿಯಾಗಿಯೇ ಹೇಳಿದ್ದಾರೆ: "ಉತ್ತರ್ ಮೇ ಗಂಗಾ, ದಕ್ಷಿಣ್ ಮೇ ಸಿದ್ಧಗಂಗಾ!” ಪ್ರಯಾಗಕ್ಕೆ ಎತ್ತರದ ಹಿಮಾಲಯದಿಂದ ಅಧೋಮುಖವಾಗಿ ಗಂಗೆ ಹರಿದು ಬಂದರೆ ಸಿದ್ಧಗಂಗೆಯ ಎತ್ತರದ ಬೆಟ್ಟಕ್ಕೆ ಊರ್ಧ್ವಮುಖವಾಗಿ ಹರಿದು ಬಂದದ್ದು ಹಳ್ಳಿ ಹಳ್ಳಿಗಳಿಂದ, ನಗರ ಪಟ್ಟಣಗಳಿಂದ ಭಕ್ತಿಯ ರಸಗಂಗೆ! ಅದು ಗುರುಭಕ್ತಿಯ ಮಹಾಪೂರ! ಇಡೀ ಕರ್ನಾಟಕ ರಾಜ್ಯ ಸರಕಾರವೇ ಅಂದು ಸಿದ್ಧಗಂಗೆಯಲ್ಲಿತ್ತು. ದೇವರ ಸನ್ನಿಧಿಯಲ್ಲಿ ಹುಲಿ, ಸಿಂಹ, ನಂದಿ, ನವಿಲು, ಆನೆ, ಹಾವು, ಇಲಿ -ಹೀಗೆ ಎಲ್ಲವೂ ಆಜನ್ಮವೈರತ್ವವನ್ನು ತೊರೆದು ಒಟ್ಟಿಗೆ ಇರುವಂತೆ ಆಳುವ ಪಕ್ಷ, ವಿರೋಧ ಪಕ್ಷ ಎಂಬ ಭೇದಭಾವ ಇಲ್ಲದೆ ಎಲ್ಲ ರಾಜಕೀಯ ಪ್ರಮುಖರೂ ಎರಡೂ ದಿನಗಳು ಸಿದ್ಧಗಂಗೆಯ ಬೆಟ್ಟದ ತಪ್ಪಲಿನಲ್ಲಿ ಒಟ್ಟಾಗಿ ಸೇರಿದ್ದರು! ಅವರೆಲ್ಲ ಗಂಟೆಗಟ್ಟಲೆ ಶಾಂತವಾಗಿ ಒಟ್ಟಿಗೆ ಕುಳಿತ ದೃಶ್ಯ ನೋಡಿದವರಿಗೆ ಒಂದು ರೀತಿಯಲ್ಲಿ "ರಾಜಕೀಯ ಕದನ ವಿರಾಮ"ದಂತಿತ್ತು! ಅಶಾಂತ ಮನಸ್ಸಿನಿಂದ ತೊಳಲಾಡುತ್ತಿದ್ದ ಅವರಿಗೂ ಅದರ ಅವಶ್ಯಕತೆ ಇತ್ತು!

ಶ್ರೀಗಳವರು ಮಾಗಡಿ ತಾಲ್ಲೂಕಿನ ವೀರಾಪುರ ಗ್ರಾಮದ ಹೊನ್ನಪ್ಪ- -ಗಂಗಮ್ಮ ದಂಪತಿಗಳ 13ನೆಯ ಮಗನಾಗಿ ಜನಿಸಿದರು. (ಎಪ್ರಿಲ್ 1, 1908) ಕೊನೆಯ ಮಗನಾಗಿ ತಂದೆ ತಾಯಿಗಳ ಕಣ್ಮಣಿಯಾಗಿದ್ದ ಅವರ ಜನ್ಮನಾಮ ಶಿವಣ್ಣ. 1927ರಲ್ಲಿ ಆಗಿನ ಸಿದ್ಧಗಂಗಾ ಮಠಾಧಿಪತಿಗಳಾಗಿದ್ದ ಶ್ರೀ ಉದ್ದಾನ ಶಿವಯೋಗಿಗಳವರ ಕೃಪಾ ಕಟಾಕ್ಷ ಅವರಿಗೆ ದೊರೆಯಿತು. ಗುಬ್ಬಿ ತೋಟದಪ್ಪನವರ ಛತ್ರದಲ್ಲಿ ಆಶ್ರಯ ಪಡೆದು ಬೆಂಗಳೂರಿನ ಸೆಂಟ್ರಲ್ ಕಾಲೇಜಿನಲ್ಲಿ ಶಿವಣ್ಣ ವಿದ್ಯಾಭ್ಯಾಸ ಮಾಡುತ್ತಿದ್ದ ಸಂದರ್ಭದಲ್ಲಿ ಸಿದ್ಧಗಂಗಾ ಮಠದಲ್ಲಿ ಒಂದು ದುರ್ಘಟನೆ ನಡೆಯಿತು. 1930ರಲ್ಲಿ ಶ್ರೀ ಉದ್ದಾನ ಶಿವಯೋಗಿಗಳವರ ನಿಯೋಜಿತ ಉತ್ತರಾಧಿಕಾರಿ ಶ್ರೀ ಮರುಳಾರಾಧ್ಯರು ಆಕಸ್ಮಿಕವಾಗಿ ಲಿಂಗೈಕ್ಯರಾದರು. ಕ್ರಿಯಾ ಸಮಾಧಿಗೆ ಬಂದಿದ್ದ ಶಿವಣ್ಣನವರನ್ನು ಗುರುಗಳು ತಮ್ಮ ಉತ್ತರಾಧಿಕಾರಿ ಎಂದು ಘೋಷಿಸಿಯೇ ಬಿಟ್ಟರು! ಶ್ರೀ ಶಿವಕುಮಾರ ಸ್ವಾಮಿಗಳೆಂಬ ಅಭಿದಾನ ನೀಡಿಯೂ ಬಿಟ್ಟರು. ಬಿಳಿಯುಡುಗೆ ಉಟ್ಟು ಸಿದ್ಧಗಂಗೆಗೆ ಬಂದಿದ್ದ ಶಿವಣ್ಣ ಕಾಷಾಯ ವಸ್ತ್ರ ಧರಿಸಿ ಶಿವಕುಮಾರ ಸ್ವಾಮಿಗಳಾಗಿ ಬೆಂಗಳೂರಿಗೆ ಮರಳಿ ವಿದ್ಯಾಭ್ಯಾಸ ಮುಂದುವರಿಸಿದರು. ಪ್ರಥಮ ದರ್ಜೆಯಲ್ಲಿ ಉತ್ತೀರ್ಣರಾಗಿ ಮಠಕ್ಕೆ ಹಿಂದಿರುಗಿ ಅಂದಿನಿಂದ ಮಠದ ಏಳಿಗೆಗೆ ತಮ್ಮ ಸಂಪೂರ್ಣ ಸಮಯವನ್ನು ಮೀಸಲಿಟ್ಟರು. ಮುಂದೆ ಶ್ರೀ ಉದ್ದಾನ ಶಿವಯೋಗಿಗಳವರು ಲಿಂಗೈಕ್ಯರಾದ ನಂತರ ಮಠದ ಸಂಪೂರ್ಣ ಉಸ್ತುವಾರಿ ಶ್ರೀಗಳವರ ಹೆಗಲೇರಿತು. ಆರಂಭದ ದಿನಗಳು ಅವರಿಗೆ ಬಹಳ ಕಷ್ಟದ ದಿನಗಳು. ಅನೇಕ ಕಷ್ಟ ಕಾರ್ಪಣ್ಯಗಳನ್ನು ಅವರು ಹೊತ್ತು ನಿತ್ತರಿಸಿದರು. ಆಗ ಮಠದ ಆದಾಯ ತೀರಾ ಕಡಿಮೆ. ಶ್ರೀಗಳವರು ಹಳ್ಳಿ ಹಳ್ಳಿಗಳಿಗೆ ಕಾಲು ನಡಿಗೆಯಲ್ಲೇ ಭಕ್ತದ ಮನೆ ಮನೆಗೆ ತೆರಳಿ ದವಸ ಧಾನ್ಯಗಳನ್ನು ಸಂಗ್ರಹಿಸಿ ಬಡಮಕ್ಕಳಿಗೆ ಅನ್ನದಾನ ಮಾಡಿದರು. ಬರುಬರುತ್ತಾ ಮಠ ಪ್ರವರ್ಧಮಾನಕ್ಕೆ ಬಂದಿತು. ಸಿದ್ಧಗಂಗಾ ಮಠ ದೇಶದ ಭೂಪಟದಲ್ಲಿ ಒಂದು ಸ್ಥಾನ ಪಡೆಯಲು ಶ್ರೀಗಳವರ ಕಾಯಕ ನಿಷ್ಠೆಯೇ ಕಾರಣ.

ಉತ್ತರ ಭಾರತದ ಪ್ರಯಾಗದಲ್ಲಿ ಮೂರು ನದಿಗಳು ಸಂಗಮಿಸುತ್ತವೆ. ಗಂಗಾ, ಯಮುನಾ ಮತ್ತು ಅಂತರಗಾಮಿಯಾದ ಸರಸ್ವತೀ, ಅಲ್ಲಿ ಪುಣ್ಯಸ್ನಾನ ಮಾಡಲು ಶ್ರದ್ಧಾಳುಗಳು ಹಾತೊರೆಯುತ್ತಾರೆ. ಕುಂಭಮೇಳದ ಸಂದರ್ಭದಲ್ಲಂತೂ ನದಿಯ ನೀರೂ ಸಹ ಕಾಣದಂತೆ ಉಕ್ಕಿ ಹರಿಯುವ ಜನಸಾಗರ! ಪ್ರಯಾಗದಲ್ಲಿ ಮೂರು ನದಿಗಳು ಸಂಗಮಿಸಿದಂತೆ ಕರ್ನಾಟಕದಲ್ಲಿ ಮೂರು ಮಠಗಳ 'ತ್ರಿವೇಣಿ ಸಂಗಮವಿದೆ- ಅದೇ ಸಿದ್ಧಗಂಗಾ, ಸಿರಿಗೆರೆ ಮತ್ತು ಸುತ್ತೂರು. ಈ ಮೂರೂ ಮಠಗಳ ತ್ರಿವೇಣಿ ಸಂಗಮದಲ್ಲಿ ಮಿಂದೆದ್ದವರು ಲಕ್ಷಾಂತರ ಬಡಮಕ್ಕಳು. ಈ ಮಠಗಳ ಹಿರಿಯ ಗುರುವರ್ಯರುಗಳಿಗೆ ಲಿಂಗಪೂಜೆಗಿಂತಲೂ ಬಡ ಮಕ್ಕಳ ಬಾಳನ್ನು ರೂಪಿಸುವ ಅನ್ನದಾನ, ವಿದ್ಯಾದಾನಗಳೇ ಮಹಾಪೂಜೆಯಾಗಿತ್ತು. ನಮ್ಮ ವಿದ್ಯಾಗುರುಗಳಾದ ರಾಷ್ಟ್ರಕವಿ ಶಿವರುದ್ರಪ್ಪನವರ ಬದುಕು ಅರಳಿದ್ದು ಸಿದ್ಧಗಂಗಾ ಮಠದಲ್ಲಿಯೇ. ತಾವು ವಿದ್ಯೆ ಪಡೆದ ಸಿದ್ಧಗಂಗೆಯ ಶ್ರೀ ಚರಣಕ್ಕೆ ಅರ್ಪಿಸಿದ ಅವರ ಅಕ್ಷರ ಕುಸುಮ ಹೀಗಿದೆ:

ಭಿಕ್ಷೆ ಹೊರಟಿದೆ ಜಂಗಮದ ಜೋಳಿಗೆ, ಲಕ್ಷ ಜನಗಳ ಪೊರೆದಿದೆ; 
ತೀರ್ಥವಾಗಿದೆ ಭಕ್ತರಿಗೆ, ಚಿರಸ್ಪೂರ್ತಿಯಾಗಿದೆ ಬುದ್ಧಿಗೆ 
ಬಂದ ಹಣತೆಗೆ ಎಣ್ಣೆ - ಬತ್ತಿಯ - ದೀಪ್ತಿದಾನವ ಮಾಡಿದೆ
ರಕ್ಷೆಯಾಗಿದೆ ಮುಗಿಲನೇರಿದ ಎಷ್ಟೊ ರೆಕ್ಕೆಯ ಹಾದಿಗೆ.

ಜೀವನದ ಉದ್ದಕ್ಕೂ ಪರಾರ್ಥಕ್ಕಾಗಿ ಶರೀರವನ್ನು ಸವೆಸಿದ ಮಹಾನ್ ಶಿವಯೋಗಿ ಶ್ರೀ ಶಿವಕುಮಾರ ಸ್ವಾಮಿಗಳವರದು ಸಮಾಜಮುಖಿ ಬದುಕು; ಉರಿಯುಂಡ ಕರ್ಪೂರದಂತಹ ಬದುಕು.

ನಮ್ಮ ಗುರುವರ್ಯರು ಮತ್ತು ಸಿದ್ಧಗಂಗೆಯ ಲಿಂಗೈಕ್ಯ ಗುರುವರ್ಯರ ಮಧ್ಯೆ ಸುಮಧುರ ಸಂಬಂಧವಿತ್ತು. ಕಾಕತಾಳೀಯವೆಂಬಂತೆ ಇಬ್ಬರ ಹೆಸರೂ ಸಹ ಒಂದೇ -ಶ್ರೀ ಶಿವಕುಮಾರ ಸ್ವಾಮಿಗಳು. ನಮ್ಮಗುರುಗಳವರು ಅವರನ್ನು ನಮ್ಮ ಮಠದ ವಾರ್ಷಿಕ ಸಮಾರಂಭವಾದ ತರಳಬಾಳು ಹುಣ್ಣಿಮೆ ಮಹೋತ್ಸವಕ್ಕೆ ಆಹ್ವಾನಿಸಿದಾಗಲೆಲ್ಲಾ ಅವರು ತುಂಬ ಪ್ರೀತಿ ಮತ್ತು ಅಭಿಮಾನಗಳಿಂದ ಭಾಗವಹಿಸುತ್ತಿದ್ದರು. ನಮ್ಮ ಗುರುಗಳವರೂ ಅಷ್ಟೇ ಪ್ರೀತ್ಯಾದರದಿಂದ ಸಿದ್ಧಗಂಗೆಯ ಕಾರ್ಯಕ್ರಮಗಳಲ್ಲಿ ಭಾಗವಹಿಸುತ್ತಿದ್ದರು. ಪರಸ್ಪರ ಭೇಟಿಯಾದಾಗ ಇಬ್ಬರ ಕೈಗಳು ಪರಸ್ಪರ ಹಿಡಿಯುತ್ತಿದ್ದವು; ಕ್ಷಣಮಾತ್ರದಲ್ಲಿ ಒಬ್ಬರೊಬ್ಬರ ಪಾದಕ್ಕೆ ನಮಸ್ಕರಿಸಿಬಿಡುತ್ತಿದ್ದರು! 1979 ರಲ್ಲಿ ನಮ್ಮ ಪಟ್ಟಾಭಿಷೇಕ ಸಿರಿಗೆರೆಯಲ್ಲಿ ಜರುಗಿದಾಗ ಪಾಲ್ಗೊಂಡು ನಮ್ಮನ್ನು ಆಶೀರ್ವದಿಸಿದ್ದರು. ನಮ್ಮ ಕಾಲದಲ್ಲೂ ಎರಡೂ ಮಠಗಳ ಸಂಬಂಧ ಹಿಂದಿನಷ್ಟೇ ಸುಮಧುರವಾಗಿ ಮುಂದುವರಿದಿದೆ.

ಇಂದು ಸಿದ್ಧಗಂಗೆಯಲ್ಲಿ ಅವರ ಶ್ರದ್ದಾಂಜಲಿ ಸಮಾರಂಭ. ಜನ್ಮಜನ್ಮಾಂತರಗಳಲ್ಲಿಯೂ ತೀರಿಸಲಾರದಷ್ಟು ಋಷಿ ಋಣ ಭಕ್ತ ಸಮುದಾಯದ ಮೇಲಿದೆ. ವಾರದ ಹಿಂದೆ ಬೆಟ್ಟದ ತಪ್ಪಲಿನಲ್ಲಿ ನಡೆದ ಅವರ ಕ್ರಿಯಾ ಸಮಾಧಿಯ ಬಳಿ ನೆರೆದಿದ್ದ ಭಕ್ತರು ಗುರುಗಳವರಿಗೆ "ಭಾರತ ರತ್ನ" ಪ್ರಶಸ್ತಿಯನ್ನು ನೀಡಬೇಕೆಂದು ಘೋಷಣೆಗಳನ್ನು ಕೂಗುತ್ತಿದ್ದರು. ಭಾರತ ರತ್ನ ಅವರ ವ್ಯಕ್ತಿತ್ವಕ್ಕೆ ತುಂಬಾ ಚಿಕ್ಕದು. ಸರಕಾರ ಅವರಿಗೆ ಭಾರತ ರತ್ನ ಕೊಡದೇ ಇದ್ದರೂ ಆ ಪ್ರಶಸ್ತಿಯನ್ನು ಮೀರಿಸುವ ಘನ ವ್ಯಕ್ತಿತ್ವ ಅವರದು. ಅವರು ಭಾರತ ರತ್ನ ಅಲ್ಲ, ವಿಶ್ವರತ್ನ!

-ಶ್ರೀ ತರಳಬಾಳು ಜಗದ್ಗುರು
ಡಾ|| ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು
ಸಿರಿಗೆರೆ.

ವಿಜಯ ಕರ್ನಾಟಕ 
ಬಿಸಿಲು ಬೆಳದಿಂಗಳು ದಿ: 31.01.2019