ಮುಂಬೈ ನಗರದಲ್ಲಿರುವ ಶರಣ ಸಂಕುಲ ಸಂಸ್ಥೆಯು ಬಸವ ಜಯಂತಿ ಮತ್ತು ರಜತೋತ್ಸವ ಕಾರ್ಯಕ್ರಮವನ್ನು ಇದೇ ಜೂನ್ 9ರಂದು ಭಾನುವಾರ ಏರ್ಪಡಿಸಿದ್ದು ಪರಮಪೂಜ್ಯ ಶ್ರೀ ಜಗದ್ಗುರುಗಳವರನ್ನು ಆಹ್ವಾನಿಸಿರುತ್ತದೆ. 

25 ವರ್ಷಗಳ ಹಿಂದೆ ಶ್ರೀ ಜಗದ್ಗುರುಗಳವರು ಮುಂಬೈಗೆ ದಯಮಾಡಿಸಿದಾಗ ನಮ್ಮ ಮಠದ ಆಗಿನ ವಿದ್ಯಾರ್ಥಿಗಳು ಪರಮಪೂಜ್ಯರ ಮಾರ್ಗದರ್ಶನದಲ್ಲಿ ಸಿದ್ಧಪಡಿಸಿದ ಬಸವಾದಿ ಶಿವಶರಣರ ಜೀವನಾಧಾರಿತ ಶರಣ ಸಂಕುಲ ಎಂಬ ನೃತ್ಯ ರೂಪಕವನ್ನು ಯಶಸ್ವಿಯಾಗಿ ಅಭಿನಯಿಸಿದ್ದರು. ಇದರಿಂದ ಪ್ರಭಾವಿತರಾದ ನವೀ ಮುಂಬೈನಲ್ಲಿರುವ ಮಹಾರಾಷ್ಟ್ರ, ಆಂಧ್ರಪ್ರದೇಶ ಮತ್ತು ಕರ್ನಾಟಕದ ಬಸವ ತತ್ವಾಭಿಮಾನಿಗಳು ಶ್ರೀ ಜಗದ್ಗುರುಗಳವರ ಸಲಹೆ ಪಡೆದು "ಶರಣ ಸಂಕುಲ" ಎಂಬ ಹೆಸರಿನಲ್ಲಿಯೇ ಈ ಸಂಸ್ಥೆಯನ್ನು ಸ್ಥಾಪಿಸಿದ್ದರು. 

ಇದರ ರಜತೋತ್ಸವ ಮತ್ತು ಬಸವ ಜಯಂತಿ ಕಾರ್ಯಕ್ರಮ ನಾಳೆ ಬೆಳಿಗ್ಗೆ ಮುಂಬೈನಲ್ಲಿ ಶ್ರೀ ಜಗದ್ಗುರುಗಳವರ ಸಮ್ಮುಖದಲ್ಲಿ ನಡೆಯಲಿದೆ. ಮಠದ ಈಗಿನ ಯುವ ವಿದ್ಯಾರ್ಥಿಗಳು ಮತ್ತು ಅಧ್ಯಾಪಕರು ಮತ್ತೊಮ್ಮೆ ಶರಣ ಸಂಕುಲ ನೃತ್ಯ ರೂಪಕ ಮತ್ತಿತರ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಪ್ರಸ್ತುತಪಡಿಸಲಿದ್ದಾರೆ. ಮಠದ ಹಿಂದಿನ ಹಿರಿಯ ಕಲಾವಿದರು ಮತ್ತು  ಈಗಿನ ಒಂದು ನೂರಕ್ಕೂ ಹೆಚ್ಚು ಯುವ ಕಲಾವಿದರೊಂದಿಗೆ ಶ್ರೀ ಜಗದ್ಗುರುಗಳವರು ನಿನ್ನೆಯ ದಿನ ಸಿರಿಗೆರೆಯಿಂದ ಮುಂಬೈಗೆ ಪ್ರಯಾಣ ಬೆಳೆಸಿದರು. 

ಮಹಾರಾಷ್ಟ್ರದ ಮತ್ತೊಂದು ಪ್ರಮುಖ ನಗರವಾದ ಜಲಗಾಂವ್ ನಲ್ಲಿಯೂ ಮಠದ ಯುವಕಲಾವಿದರು  ಜೂನ್ 13ರಂದು ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ನೀಡಲಿದ್ದಾರೆ.